Día da Restauración da Memoria Lingüística

O pasado domingo, na parroquia do Viso, celebramos o Día da Restauración da Memoria Lingüística. Durante o acto deuse conta dos motivos polos cales fometamos o uso do galego nos actos funerarios: en camposantos onde o 90% dos defuntos falaron galego, as lápidas están o 99% en castelán. Esta anomalía lingüística haina que corrixir a partir da pedagoxía, divulgación e querenza polo que somos.

Temos que agradecer a Asociación de Funcionarios/as para a Normalización Lingüística a súa colaboración, ao párroco do Viso, Carlos, a súa complicidade e aos colectivos sociais, culturais e veciñais.

Fíos do querer (Apego)

Este venres 25 de outubro, ás 18h da tarde, teremos na Alameda (a carón da estatua de Castelao) a Cé Orquestra Pantasma. Un espectáculo de música, cantigas e danzas recomendado para crianzas de 0 a 5 anos.

En caso de choiva, o acto trasladarase ao Auditorio da Xunqueira.

A actividade, organizada polo Servizo de Normalización Lingüística, forma parte do proxecto Apego para fomentar o uso e transmisión da lingua galega.

Expo “Luces de Alén Mar”

O pasado venres inaugurouse na Sala 1 do Multiúsos da Xunqueira a exposición “Luces de alén mar. As escolas de americanos en Galicia”. Ao acto asistiron a alcaldesa Digna Rivas, o concelleiro de Cultura Daniel Boullosa e o vicepresidente do Consello da Cultura Galega e director do Arquivo da Emigración, Xosé Manoel Núñez Seixas.

 

Trátase dunha expo preparada polo Consello da Cultura Galega e que chega a Redondela no marco do convencio asinado este ano entre ambas institucións e promovido polo Servizo de Normalización Lingüística.

 

A mostra inclúe moita información sobre o pasado migratorio de Galicia, e o esforzo que realizou a comunidade galega en América para levantar escolas de ensino, formación e asociación.

 

Estará até o 31 de outubro.

Concerto das Maimiñas

Este venres 27 de setembro volven os Venres Cativos (incluído no proxecto Apego), un programa de actividades en lingua galega para fomentar o uso e a transmisión do noso idioma.

Un concerto para iniciar o curso escolar con azos e cheos da fantasía que dá viaxar polo mundo para coñecer outras culturas e pobos.

Hora: 18:00
Lugar: Auditorio da Xunqueira
Entrada: De balde

Difundide, organizade e non faltedes a esta emocionante viaxe da man das Maimiñas!

Presentación de Estirpe e homenaxe a Ferrín

O Concello de Redondela, por iniciativa do seu Servizo de Normalización Lingüística, reedita nos seus 25 anos o libro “Estirpe”, de Xosé Luís Méndez Ferrín. Con esta inicitiva, a Administración local quere render homenaxe a un dos libros máis relevantes da literatura contemporánea e, a través deste, facer unha homenaxe ao seu escritor.

O acto celebrarase no Auditorio da Xunqueira o vindeiro xoves 13 de xuño ás 19:30. María do Ceo porá a música, haberá un breve recital poético de “Estirpe”, e tomarán a palabra o director de Edicións Xerais, o presidente do Parlamento de Galicia, o Alcalde de Redondela e pechará o propio autor, Méndez Ferrín.

Por todo isto, cada persoa que asista ao acto volverá a casa cun exemplar gratuíto deste poemario. É importante que nas casas haxa libros, nun tempo de tanta lectura virtual en aplicacións móbiles e informáticas. Achegar “Estirpe” é unha forma de difundir e poñer en valor unha relevante obra poética.

“Estirpe” é un canto á conformación histórica do pobo galego onde a natureza, os personaxes históricos e a tradición popular se unen grazas ao poderoso verso de Ferrín. Un libro que amosa claramente o por que é Xosé Luís Méndez Ferrín un dos autores imprescindibles da historia da literatura galega.

Xornadas Casto Sampedro

O Concello de Redondela e o Concello de Pontevedra, canda a Sociedade Antropolóxica Galega e coa colaboración do SNL de Redondela e o Museo de Pontevedra, organizan unhas xornadas dedicadas ao egrexio intelectual redondelán Casto Sampedro.

Esta actividade organízase en dous días co propósito de coñecer diversos aspectos de Castro Sampedro pero tamén outros aspectos da actual investigación antropolóxica.

O venres 3 de maio, na Casa da Cultura de Redondela, teremos a primeira xornada:

17:30 Presentación das xornadas a cargo de Rafael Quintía e de Xulia Feixoo

18:00 Conferencia de Xavier Groba, “Ao ronsel de Casto Sampedro: estado actual da etnomusicoloxía galega”.

18:45 Conferencia de Beatriz Busto, “Galicia conxelada. A necesidade da reflexión antropolóxica na actualidade”.

19:30 Descanso

19:45 Conferencia Rafael Rodríguez, “Entre sachadores e burócratas. Unha ollada á arqueoloxía galega actual”.

20:30 Mesa redonda e coloquio final

 

O sábado 4 de maio as actividades continúan en Pontevedra, nas ruínas de San Domingos, co seguinte programa:

10:30 Música a cargo d´Os Trubincos do Batán.

10:45 Roteiro por Pontevedra, “Tras as pegadas de Casto Sampedro en Pontevedra”, a cargo de Telmo Crespo.

 

 

Obradoiro de debuxo rítmico

Chega un novo “Venres Cativo”. Desta volta mirámonos o venres 26 de abril no Multiúsos da Xunqueira.

Haberá dúas sesións: 17:30, para crianzas entre 0-4 anos; 18:30, para crianzas entre 5-10 anos.

Títeres Babaluva impartirá este obradoiro para promover a lectoescritura xogando e cantando, relacionando sons con garabatos. Esta proposta procura conectar nas nosas cativas e cativos co ritmo, a palabra e o debuxo.

Para os nenos e nenas de 4-10 anos o propósito consiste en ilustrar as letras das cancións ao ritmo da música. Canción e ilustración van xuntos pois mentres escoitas tamén tes que debuxar como expresión inmediata dos nosos sentidos.

Este obradoiro ten límite de prazas. Para inscribirse podedes enviar os datos da crianza e dos familiares que acompañen a normalizacion@redondela.gal ou chamando o 986400300

A actividade é de balde