Valentín Paz Andrade nas Letras Galegas 2012

O Plenario da Real Academia Galega, reunido en sesión ordinaria o día 4 de xuño de 2011, acordou dedicar o Día das Letras Galegas do ano 2012 a Valentín Paz Andrade (Lérez, Pontevedra, 1898 – Vigo, 1987).

Valentín Paz Andrade licenciouse en Dereito pola Universidade de Santiago de Compostela en 1921 e foi durante a súa etapa de estudante cando se achegou ao movemento galeguista, participou na II Asamblea Nacionalista de Santiago de Compostela (1919). Era director do xornal Galicia en 1926 cando foi cerrado pola ditadura de Primo de Rivera. Presidiu o Grupo Autonomista Galego (1930), foi candidato ás Cortes Constituíntes de 1931 xunto con Castelao e Ramón Cabanillas, colaborador da redacción do anteproxecto de Estatuto de Galicia presentado polo Seminario de Estudos Galegos (1931) e membro activo do Partido Galeguista, do que foi nomeado secretario en 1934.

Durante a Guerra Civil axudou a fuxir e defendeu a moitos intelectuais galeguistas. Por causa da súa actividade política e da publicación dalgúns artigos foi detido en diversas ocasións.

As súas colaboracións foron frecuentes nos xornais El Pueblo Gallego, Faro de Vigo e La Noche, onde aparecían asinadas cos pseudónimos M., Xan Quinto e Mareiro. Desde 1945 xuntábase no café Alameda, de Vigo, con intelectuais e artistas como Carlos Maside, Laxeiro, Prego de Oliver, Fernández del Riego, os irmáns Xosé María e Emilio Álvarez Blázquez, entre outros, para falaren e debateren.

Os seus escritos literarios, históricos e económicos reflicten a súa preocupación polo progreso e o avance de Galicia, Galicia como Tarea (1959), La anunciación de Valle-Inclán 1967),  La marginacíón de Galicia (1970), Castelao na luz e na sombra (1982), Galiza lavra a sua imagem (1985).

Da súa faceta poética temos achegas como, Soldado da morte (1921), Pranto matricial (1954), Sementeira do vento (1968), Cen chaves de sombra (1979) ou Cartafol de homenaxe a Ramón Otero Pedrayo (1985).

Foi membro correspondente da Real Academia Galega desde 1964 e numerario desde 1978, cando deu lectura ao preceptivo discurso, que titulou A galecidade na obra de Guimarães Rosa, e que foi respondido en nome da institución por Álvaro Cunqueiro.

Máis información en:

ENCICLOPEDIA GALEGA UNIVERSAL

GALIPEDIA

CULTURAGALEGA.ORG

SEMENTEIRA DO VENTO

ASOCIACIÓN DE ESCRITORES EN LINGUA GALEGA



Centenario de Cunqueiro

Con motivo de celebrarse neste 2011 o centenario do nacemento de Álvaro Cunqueiro, o Consello da Cultura Galega organiza unha serie de eventos conmemorativos desta efeméride.

Entre elas vén de ser presentada a iniciativa “A cociña galega con Cunqueiro“, que quere difundir a obra literaria e gastronómica do escritor mindoniense e o acervo gastronómico do país, en colaboración cos restaurantes de Galicia.

O obxectivo é levar os pratos máis queridos do principal escritor gastronómico de Galicia ás cociñas dos restaurantes, e recuperar así a rica tradición gastronómica galega, ao tempo que os establecementos se converten nun privilexiado espazo de difusión cultural. Deste xeito xúntanse cociñeiros de Galicia tradicionais e contemporáneos que, cada un dende o seu diferente estilo, renderán unha homenaxe ao escritor que dignificou a gastronomía de Galicia e lle deu carta de identidade no mundo. O proxecto incluirá a distribución de 10.000 exemplares dunha antoloxía literaria e gastronómica de Don Álvaro Cunqueiro entre os clientes dos restaurantes de Galicia.

Aqueles restaurantes que queiran participar poden dirixirse ao responsable do proxecto no Consello da Cultura Galega (Manuel Gago), a través deste correo electrónico director@culturagalega.org,  ou ben chamar ao teléfono 981957219 (luns a venres, de 09 a 15 h).

Tamén poden solicitar información neste Servizo de Normalización Lingüística no teléfono 986402842 ou no correo electrónico normalizacion@redondela.info

Memorias dun neno labrego, na Xunqueira

Cándido Pazó estará mañá na Xunqueira coas súas Memorias das Memorias dun neno labrego, incluída dentro da programación XEIRAS DA LINGUA das Letras Galegas 2011.


Este monólogo escénico-narrativo, está producido por Abrapalabra, creacións escénicas en colaboración co AGADIC, e baséase no libro homónimo de Xosé Neira Vilas, que está a representarse en numerosos lugares de Galicia e da Arxentina. O obxectivo é recoñecer e homenaxear o autor e a súa obra, no 50 aniversario da súa primeira edición.

Memorias dun neno labrego publicouse en Buenos Aires en 1961, e co tempo converteuse nun dos libros máis senlleiros da literatura galega: foi o máis editado, lido e traducido. Ademais tivo a capacidade de manter viva a memoria dunha sociedade que foi deixando de ser eminentemente rural e iniciou un longo percorrido cara o universo urbano, que foi alongándose nestes últimos 50 anos adoptando mestizaxes e novos modos de vida que explican a nosa moderna identidade.

Trátase dun espectáculo emotivo e divertido que combina a experiencia de Cándido Pazó como autor, actor e director, coa súa recoñecida traxectoria como contador de historias e monologuista. Xúntanse así a estilización formal do teatro e máis a comunicación fresca e directa do monólogo cómico. Ademais conta cun gran atractivo visual, pois apoia a parte escénica nun coidado traballo de vídeo creación e elaborada iluminación, que conseguen debuxar unha suxestiva escenografía das emocións.

O espectáculo representarase no Auditorio da Xunqueira o vindeiro sábado, 7 de maio de 2011, ás 20.00 horas. As entradas (á venda por 3 €) pódense reservar no teléfono 986 402865, e deberán ser retiradas media hora antes do inicio da función.

III Semana do libro, a festa das palabras

O Servizo de Normalización Lingüística e máis as Bibliotecas públicas de Redondela organizan, por terceiro ano consecutivo, a Semana do libro, a festa das palabras.

A conmemoración, o vindeiro 23 de abril, do día do libro, serve de pretexto para facer esta exposición multilingüe, que se instalará en espazos pouco convencionais (como as alamedas ou a entrada dos multiusos), e que este ano ademais, visitará os centros de ensino de primaria do noso concello cunha biblio-caravana.

Grazas á colaboración das diferentes institucións ás que se solicitaron os libros: Instituto Camðes, Euskararen Donostia Patronatua (Servizo de promoción do éuscaro do Concello de Donostia), Dirección de Promoción do Éuscaro (Goberno Vasco), Secretaría de Política Lingüística (Generalitat de Catalunya), Academia de la Llingua Asturiana, e Academia de L’Aragonés, foi posible expoñer estes materiais multilingües nos diferentes idiomas da Península Ibérica (galego, castelán, portugués, catalán, aranés, éuscaro, asturiano e aragonés). Ademais de dispor tamén da achega de materiais dos fondos da Biblioteca Municipal e da Axencia de Lectura de Chapela.

Pero ademais, este ano contouse coa colaboración de Protección Civil de Redondela (que serve de apoio loxístico desprazando a biblio-caravana duns lugares a outros), e do Ciclo Superior de Educación Infantil do IES de Chapela, que envía o seu alumnado para realizar actividades de contacontos e promoción da lingua galega para os nenos e nenas de ensino infantil dos centros a onde chega a exposición.

Con esta mostra multilingüe xúntanse o obxectivo inicial de celebrar o día do libro, e procurar unha animación efectiva á lectura, co obxectivo transversal e multidisciplinario de mostrar a diversidade cultural e lingüística dos territorios que nos son máis próximos, e facer fincapé na necesidade do respecto e promoción de todas as linguas, por pequena que sexa a súa distribución ou o número de falantes, pois todas elas constitúen e enriquecen o noso patrimonio cultural.

A programación inclúe visitas da biblio-caravana aos centros de primaria redondeláns nas semanas do 11 ao 15, e do 26 ao 29 de abril; exposición nas alamedas de Chapela e Redondela nas mañás dos días 18, e 19 e 20 (respectivamente); unha conferencia sobre o Premio Carballo Calero de investigación 2009 (20 de abril, ás 20.00 h na Casa da Cultura); e unha exposición permanente dos diferentes materiais na entrada do Multiusos da Xunqueira do 3 ao 6 de abril. As persoas que se acheguen á caravana poderán tamén consultar, no tríptico informativo, un pequeno glosario multilingüe que axudará a apreciar as diferencias e semellanzas entre as distintas linguas, coa intención de promover a curiosidade sobre as mesmas e animar a mellorar o seu coñecemento.

PROGRAMACIÓN DOS CENTROS
11 abril: CEIP Quintela
12 abril: CEIP Outeiro das Penas
13 abril: CEIP Porto Cabeiro
14 abril: CEIP de Cedeira
15 abril: CEIP Igrexa – Chapela
26 abril: CEIP Sto. Paio de Abaixo (Reboreda)
27 abril: CEIP Laredo
28 abril: CEIP Alexandre Bóveda
29 abril: CEP Santa Mariña

Máis información no blog das Bibliotecas de Redondela.

NOVO SON, música en galego

A Radio Galega convocou a primeira edición do concurso NOVO SON, I Certame de músicas emerxentes, coa finalidade de descubrir e difundir o talento musical dos grupos e solistas galegos.

A participación está aberta a todos os músicos galegos maiores de 16 anos, que conten cun repertorio mínimo de 30 minutos.

O prazo para a recepción de cancións remata o 31 de marzo, e de seguido comezará o período de votacións, que se fará a través do seguinte enderezo web da Radio Galega:   http://www.radiogalega.es/novoson, e no que poderá participar calquera persoa.

Os requirimentos para participar no concurso son que os temas estean cantados en lingua galega, e que cumpran un mínimo de calidade musical e acústica.

Pódense ver as BASES premendo na ligazón.

Castelao e nós, en Chapela

Co gallo da celebración, neste ano 2011, do 125 aniversario do nacemento de Alfonso Daniel Rodríguez Castelao (30 de xaneiro de 1886), vólvese sacar á luz unha exposición da súa obra ideada no ano 2000 pola AS-PG (Asociación Socio-Pedagóxica Galega), e patrocinada pola Fundación Castelao e diferentes concellos, entre os que se atopa o Concello de Redondela.

Esta exposición, titulada daquela, “Castelao e nós. Unha viaxe pola súa obra”, vén agora mostrar a vixencia do pensamento e da obra do artista rianxeiro, e achega á cidadanía unha selección de debuxos e textos significativos do autor, que agora se expoñen baixo o título Castelao e nós, 125 aniversario.

A mostra inclúe debuxos dos álbums Nós (1931), Cousas da vida (1924-1925), Galicia mártir e Atila en Galicia (1937), e textos tirados do seu libro de ensaio político Sempre en Galiza (1944), nos que reflexiona sobre a economía e a sociedade, a emigración, a lingua, as institucións, a guerra do 36 ou o nacionalismo.

A exposición abriuse onte ao público no Multiusos do Piñeiral do Crego, en Chapela, e permanecerá nesta instalación ata o 1 de abril, aberta a toda a cidadanía.

Pódese consultar o folleto da exposición premendo na imaxe.

Día da Lingua Materna

Como vimos facendo nos últimos anos, hoxe lembramos de novo a celebración do Día Internacional da Lingua Materna.

O obxectivo desta celebración,  declarada pola UNESCO en 1999,  é impulsar as linguas maternas en todo o mundo e, maiormente, as das minorías, por seren as que se encontran nunha situación máis difícil. Deste xeito incídese na promoción da diversidade lingüística e cultural, ao tempo que se impulsa o recoñecemento, o uso e a divulgación das linguas maternas, especialmente as das linguas con menos falantes.

O Día Internacional vense celebrando dende febreiro de 2000 para promover a diversidad lingüística e cultural, e impulsar o multilingüismo. Esta data comemora o mesmo día de 1952, cando estudantes que se manifestaban polo recoñecemento da súa lingua,  o Bangla (un dos dous idiomas nacionais da entón Pakistán), foron asasinados a tiros pola policía de Dhaka, a capital do que hoxe é Bangladesh.

Nós temos, como galegos e galegas, o privilexio de termos unha lingua propia, e de vivir nunha comunidade que ten dous idiomas oficiais;  e isto, lonxe de ser unha traba ou un peso, constitúe unha riqueza e unha gran oportunidade.

Termos lingua de noso fornécenos dunha identidade colectiva que une a todos os galegos independentemente de cal sexa o idioma que falan habitualmente. Termos lingua e cultura de noso amplía o noso universo de comunicación e constitúe unha ponte que facilita o acceso a outros idiomas e culturas. É un valor engadido, unha marca que nos singulariza e dá prestixio, que nos sitúa no mundo como colectividade que ten algo máis e distinto para ofrecer. Por iso é tamén unha responsabilidade que os galegos debemos asumir: é a nosa obriga contribuír co galego ao patrimonio cultural da humanidade.

Se mantemos e incorporamos a lingua galega  á comunicación familiar, os nosos fillos ligarán o idioma que nos une coa afectividade do fogar e adquirarán máis doadamente a competencia nel.

A nosa encomenda para este día, e para todos os días do ano,  é facerlles ver aos nosos cativos que nos rodean moitas linguas e que todas son igualmente importantes, pero que a nosa lingua propia é o celme do noso ser como pobo, e o noso xeito de entender o mundo.

PRESENTACIÓN DA SXPL – Lingua_Materna_2011.swf

A cuarta parede, cinema en galego

Aínda que nas salas comerciais é case inexistente o cinema en lingua galega, a nosa lingua vai ser un pouco máis visible  no mundo do cinema a travé dunha web de recente creación sobre cinema. 

A CUARTA PAREDE é o nome desta plataforma que se converte na primeira revista dixital en galego de crítica cinematográfica.

Nela pódense ver dende as críticas das películas máis comerciais, as que están na actualidade na grande pantalla dos cinemas, até o cinema independente ou o cinema portugués actual.

E falando de cine galego, a través da páxina da Axencia Audiovisual Galega tamén podemos saber das últimas novidades do cinema do país,  visualizar os tráilers das longametraxes e moitas das curtas que se fan en Galiza a través do portal de FLOCOS.TV

A nosa lingua está cada vez máis visible, tamén no cine.

Inaugúrase a Cidade da Cultura de Galicia

Hoxe inaugúrase en Santiago de Compostela, no monte Gaiás, a Cidade da Cultura de Galicia.

Nas súas instalacións, aínda inacabadas, pódense visitar xa o Arquivo, a Biblioteca e máis as instalacións en fase de construción. E agora mesmo hai unha exposición moi interesante para a cultura, a bibliografía e máis a literatura galegas.

Códice Calixtino

A exposición “Ex libris Gallaeciae. Dos libros de Galicia“, reúne 83 libros, códices ou   manuscritos considerados chave na construción da cultura galega. Trátase dunha escolma de   xoias bibliográficas que en conxunto debuxan a historia da construción da cultura galega, e   que inclúe desde os primeiros textos romanos que comezan a definir o territorio co nome de   Callaecia ata o primeiro libro electrónico en galego.
Estará aberta ata o 25 de febreiro no edificio do Arquivo.
VISITAS
Luns e Mércores ás 17.00 h.
Sábados e Domingos ás 12.00 e 17.00 h.
VISTAS DIDÁCTICAS PARA GRUPOS
Chamar ao 981 576 753 ou enviar mail a visitasdidacticas@cidadedacultura.org

Pero tamén, dende o 15 de xaneiro ata o 25 de xuño, hai unha programación titulada   Galicia, Ceo das Letras, na que se fará un percorrido pola vida e obra de nove autores galegos  e, ademais, de tres insignes veciños convidados a esta festa homenaxe (Pessoa, Borges, Espriu).

Cada sesión constará dun relatorio inicial impartido por un experto de referencia e dunha actuación artística (música, cine, teatro…) ligada ao espírito do autor ou autora homenaxeados.