A galiña azul, de balde en Redondela (31 de marzo, ás 18h)

O venres 31 de marzo, ás 18h, no Auditorio da Xunqueira de Redondela, representarase a obra A galiña azul, escrita por Carlos Casares (autor homenaxeado no Día das Letras Galegas 2017).

Esta actividade forma parte de FalaRedes 2017, un programa de dinamización lingüística promovido dende a Xunta de Galicia, por medio da Secretaría Xeral de Política Lingüística.

A galiña azul é o punto de partida desta adaptación teatral. Un libro escrito como unha carta a unha nena chamada Ana que marchou da vila cando era cativa. O rapaz que lle escribe cóntalle anécdotas e acontecementos que ocorreron desde que ela se foi. Narracións cheas de fantasía, de maxia, pero tamén de crítica social, pois a galiña azul simboliza o dereito a ser diferentes, á liberdade.

Nadal en galego co Apego

O Nadal chega con dúas novas  actividades incluídas no programa APEGO, de dinamización lingüística da primeira infancia.

cartel_apego_activ_decembro

Baixo o título “O aloumiño dunha estrela”, a compañía AvouYouja presenta un espectáculo de danza-teatro, con música en directo, que convida aos bebés a interactuar a través dos estímulos sensoriais.aloumino-dunha-estrelaA música, interpretada en directo, de “Claro de Lúa” (do compositor Claude Debussy), serve como fío condutor sonoro da peza, que tamén está complementada por temas da música tradicional galega.

Se estarricamos moito os brazos, moi lonxe, cara ao ceo, parécenos tocar as estrelas coa punta dos nosos dedos… semella imposible, non si?
Nesta viaxe sensorial, co arrolo da música da arpa e seguindo os zapatiños vermellos, faremos posible que as pequeniñas e os pequerrechos gocen da poesía, das imaxes ata rabuñar a bóveda celeste”.

O espectáculo celebrarase o xoves 8 de decembro, ás 18:00 h, no auditorio da Xunqueira, con entrada de balde, e está destinado a bebés, de 0 a 4 anos, que poderán acompañar dúas persoas adultas.

Para participar cómpre inscribirse a través do correo electrónico normalizacion@redondela.es ou do teléfono 986400106.

E para a rapazada máis grande da casa, a compañía AS MAIMIÑAS presentan o seu espectáculo musical infantil: “Unha viaxe polo mundo“.

as-maiminasEsta é unha aventura musical en galego dirixida, principalmente, a nenas e nenos de 0 a 10 anos e as súas familias, na que durante máis dunha hora, cantarán, bailarán e gozarán dun espectáculo divertido e participativo.

Este traballo discográfico está incluído no libro-disco do mesmo nome publicado por Galaxia na colección Sonárbore.

as-maiminas_unha-viaxe-polo-mundo

“Para viaxar podes coller barcos, avións ou incluso camelo. Ou se cadra, abonda con acompañar ás MAIMIÑAS nesta volta e reviravolta musical arredor do mundo. Sabes cantar? Sabes bailar? Daquela, estás lista para viaxar”.

O espectáculo será o luns 26 de decembro, ás 19:00 h, no auditorio da Xunqueira, con entradas á venda dende dous días antes no propio espazo cun prezo de 3 € para público infantil e 5 € para público adulto.

 

NOVA DIFUSIÓN DO APEGO, AGORA XA EN 23 CONCELLOS

Coa recente adhesión dos concellos da Coruña, Ames, Mazaricos, Moaña, Muros, Oleiros, Ponteceso, Rianxo, Ribadeo, Teo e Vimianzo, ao programa Apego, chega agora o momento de comezar a traballar coas familias interesadas en incorporar o galego á crianza das súas fillas e fillos.

Estes once concellos súmanse aos doce que puxeron en marcha a iniciativa en 2015 (A Baña, Carballo, Carnota, Ferrol, Narón, Negreira, Ourense, Pontevedra, Redondela, Rois, Santiago e Vigo) co impulso inicial da Coordinadora de Traballadores/as de Normalización da Lingua (CTNL). Grazas a esta colaboración intermunicipal, a poboación atinxida polo programa Apego supera xa o millón de habitantes.

Coas novas incorporacións, Apego está xa producindo novos recursos, nesta ocasión materiais audiovisuais para a súa difusión nas redes. O primeiro deles é un vídeo para transmitir os obxectivos do proxecto, explicar o funcionamento ás persoas que desexen sumarse e divulgar o programa de xeito atractivo.

O Apego mantense desde os servizos de normalización dos concellos participantes, a onde se poden dirixir as persoas que desexen máis información ou sumarse á comunidade de usuarias.

O programa procura aumentar a porcentaxe de nenos e nenas que reciben o galego desde o berce e arroupar o seu uso no seu proceso de socialización ata os 6 anos. Dentro das accións que se realizan, a máis coñecida xa é a entrega de cadansúa caixa con información e recursos en galego ás familias que acceden a formar parte da comunidade do programa. A partir desa adhesión, reciben periodicamente información e propostas para que os seus fillos e fillas se acheguen á lingua e á cultura galegas con naturalidade desde as primeiras idades. Para lograr isto, ademais dos espazos na rede onde se facilitan recursos (www.apego.gal e www.facebook.com/apego.gal), varios concellos publican materiais específicos para divulgar a oferta de actividade infantil e tamén reforzan a programación con convocatorias nas que as nenas e nenos podes gozar, aprender e relacionarse na nosa lingua.

O Servizo de Normalización Lingüística do Concello de Redondela está na planta baixa do multiúsos da Xunqueira. Tamén se pode contactar a través do correo electrónico normalizacion@redondela.es ou no teléfono 986400106.

“Entre arrolos e contiños” para a xente miúda da casa

O Servizo de Normalización Lingüística organiza unha nova actividade para público infantil e familias dentro do programa APEGO, de dinamización lingüística da primeira infancia.

Entre arrolos e contiños” é o nome desta actividade de música e narración oral que chega da man da compañía Migallas Teatro.

A actividade achéganos contos de risa, trasnos e carapuchiñas que conseguen estimular e animar á rapazada da casa e ás súas familias. A tradición oral preséntase da man da literatura infantil ao ritmo da música para facer unha actividade lúdica e festiva.

A primeira sesión desenvolveuse o domingo 11 de setembro, ás 12:00 h, na Sociedade Cultural do Viso, con gran éxito de público.

entre-arrolos-e-continos-o-viso

O domingo 25 de setembro, ás 18:00 h, chegará ao Centro Cultural Chan das Pipas de Saxamonde.

Está indicada para nenas e nenos de 0 a 6 anos e as súas familias, que poderán gozar das historias e coñecer instrumentos como o acordeón, o xilófono ou a melódica.

entre-arrolos-e-continos

A actividade é de balde pero ten limitado o aforamento, polo que cómpre anotarse a través do correo electrónico normalizacion@redondela.es, ou do teléfono do SNL (986 400 106).

Axenda escolar redondelá 2016-17

O Servizo de Normalización Lingüística e a Concellaría de Ensino veñen de editar, un ano máis, a Axenda escolar redondelá 2016-17, que recibirán 2025 alumnas e alumnos dos centros de ensino públicos do concello.

Axendas2016-17

As axendas estanse a distribuír de xeito gratuito entre o alumnado de ensino primario do CEP Santa Mariña, CEIP Alexandre Bóveda, CEIP de Cedeira, CEIP Igrexa–Chapela, CEIP Laredo, CEIP Outeiro das Penas, CEIP Porto-Cabeiro, CEIP Quintela e CEIP Santo Paio de Abaixo, e do 1º ciclo da ESO do IES Chapela, IES Illa San Simón, IES Mendiño e IES Pedro Floriani.

Este é o quinto ano consecutivo no que o Servizo de Normalización Lingüística se encarga da edición destas axendas escolares, co obxectivo de divulgar a cultura e o patrimonio locais entre a poboación máis nova, e promover a normalización da lingua galega entre o alumnado redondelán.

A edición para o curso 2016-2017 inclúe algunhas das actividades de dinamización e normalización lingüística desenvolvidas durante o curso pasado por este SNL para os centros de ensino: roteiros de toponimia, obradoiros de teatro radiofónico, actividades de narración oral, representacións teatrais e actividades das Letras Galegas 2016.

Ademais inclúe traballos escolares e as impresións do alumnado participante nas actividades desenvolvidas. Tamén se recolle parte do patrimonio inmaterial a través de ditos e coplas, a onomástica en lingua galega, as conmemoracións escolares e as celebracións propias de Redondela, e contidos relacionados especificamente coa toponimia local.

Con esta publicación o alumnado redondelán recibe unha ferramenta útil para a organización das tarefas escolares, pero ademais serve para incentivar o seu interese polo seu contorno, a cultura local, e para normalizar o uso da lingua galega na súa vida diaria.

//e.issuu.com/embed.html#4253376/38609718

COÑECENDO REDONDELA, arquitectura e microtoponimia para a rapazada

O Servizo de Normalización Lingüística e a Concellaría de Cultura organizan unha nova actividade de divulgación do patrimonio e a microtoponimia para a rapazada redondelá.

Baixo o título COÑECENDO REDONDELA, vanse celebrar uns talleres de arquitectura e microtoponimia para nenas e nenos, co obxectivo de divulgar entre a poboación infantil o patrimonio arquitectónico de Redondela, descubrir a súa historia e afondar no coñecemento do territorio e da lingua a través da microtoponimia.

Cartel_coñecendo-Redondela

Analizarase a forma urbana, o modo de vida e o pasado de Redondela, xeografía física e humana sobre a paisaxe, o territorio e as infraestruturas.

Aspectos relacionados co asentamento da poboación no enclave físico concreto, para ver como a contorna inflúe nos modos de vida e condiciona as construcións, ao tempo que transforma a paisaxe natural. Examinaranse documentos e planos para descubrir a historia dos viadutos, e farase unha exploración activa e lúdica do Camiño de Santiago. En definitiva, un paseo sensorial que analizará a vila, as súas casas singulares, descubrindo as diferenzas tipolóxicas da arquitectura, así como elementos que dan pistas sobre a orixe dos edificios, das familias que os habitaron, o trazado das vías que influíron na configuración de Redondela e as comunicacións co exterior.

Os obradoiros desenvolveranse os días 6, 7 e 8 de setembro, en horario de mañá (de 9:30 a 11:30, e de 12:00 a 14: 00 h), no multiúsos da Xunqueira e en diversas rúas e prazas de Redondela, e están destinados a nenas e nenos de idades comprendidas entre os 6 e os 12 anos.

A actividade é de balde e as prazas son limitadas, polo que cómpre inscrición previa, que se poderá formalizar ata o 1 de setembro no teléfono 986 400 106 ou no correo electrónico normalizacion@redondela.es.

I Concurso de teatro radiofónico escolar

O Servizo de Normalización Lingüística, en colaboración coa Radio Municipal de Redondela, organiza o I Concurso de teatro radiofónico destinado a alumnado de 3º ciclo de primaria e ESO.

Bánner_concurso_teatro radiofónico

Para a preparación das pezas teatrais organizáronse unhas xornadas formativas nos centros de ensino que así o solicitaron, a través da Coordinadora de Equipos de Dinamización Lingüística de Redondela, que se desenvolveron no curso 2014-15 e 2015-16, e nas que se deron pautas para a locución e dramatización dos textos teatrais escollidos. Estas sesións formativas foron impartidas por Marián Bañobre e Santiago Cortegoso, de Ibuprofeno Teatro, e nelas participaron grupos de 8 centros educativos.

Unha vez que a dramatización das pezas foi ensaiada, o alumnado participante desprazouse á Radio Municipal de Redondela para facer as gravacións, que se realizaron entre abril e maio.

No mes de xuño realizarase o concurso entre as pezas de teatro radiofónico gravadas este curso e mais o curso pasado, que serán emitidas en Radio Redondela entre o 2 e o 17 de xuño no programa “A Estación” (entre as 12.30 e as 13.00 h – ou na redifusión entre a 1.30 e as 2.00 h), e poderanse escoitar tamén a través da páxina do Facebook do Servizo de Normalización Lingüística https://www.facebook.com/servizo.redondela/, e do seu perfil na plataforma SoundCloud: https://soundcloud.com/servizo-normalizaci-n-ling-stica-redondela/sets/teatro-radiofonico.

As persoas interesadas poderán facer as súas votacións entre o 18 e o 27 de xuño a través do correo electrónico radioredondela@hotmail.com ou do teléfono do SNL, 986 400 106 (en horario de 8 a 15.00 h). Para iso cada persoa terá que identificarse e só se computará un voto por persoa para cada unha das modalidades, que son as seguintes:

  • PREMIO Á MELLOR DRAMATIZACIÓN RADIOFÓNICA
  • PREMIO Á CALIDADE LINGÜÍSTICA

O resultado do concurso darase a coñecer o 28 de xuño, e as pezas gañadoras destas dúas modalidades terán como premio unha visita guiada ao Museo Meirande e unha viaxe en barco á Illa de San Simón para os compoñentes e profesorado responsable das pezas gañadoras, que se celebrará na primeira quincena de setembro de 2016.

Letras Galegas 2016 en Redondela

A celebración das Letras Galegas 2016, organizada polo Servizo de Normalización Lingüística, inclúe unha serie de actividades de divulgación e coñecemento da obra e da figura de Manuel María, e outras actividades complementarias de achegamento á lingua galega a través de recursos baseados na oralidade, no audiovisual e na música.

Cartel_Letras Galegas 2016

O resultado da primeira das actividades, DÍA DO LIBRO DEDICADO A MANUEL MARÍA , desenvolvida en colaboración coa Radio Municipal de Redondela, pódese escoitar nesta ligazón Letras Galegas 2016.

Nesta programación inclúense dúas actividades para alumnado dos centros de ensino redondelán:

26 de abril. HISTORIAS DE ARREPÍO, con Paula Carballeira (alumnado de secundaria).

2 e 3 de maio. MAIMIÑO E O ESPELLO MÁXICO. Cinema de animación para alumnado de infantil e primaria.

Ademais desenvolveuse tamén unha sesión de FÍOS DO QUERER, para familias e primeira infancia, co fin de achegar a lingua aos máis pequenos da casa a través da música e o xogo.

O propio DÍA DAS LETRAS GALEGAS, o 17 de maio, ás 20.00 h, a praza da Casa da Torre acolleu o concerto do grupo vocal DE VACAS, para mocidade e público adulto, con entrada de balde e incluído na programación do Festival de Títeres de Redondela.

DeVacas2

A programación continuará co espectáculo de monicreques OS SOÑOS NA GAIOLA, da compañía Títeres Alakrán, que se celebrará o domingo 29 de maio, ás 19.00 h no auditorio da Xunqueira.

Esta adaptación, para público infantil e familiar, da obra homónima de Manuel María, serve como homenaxe ao autor chairego e como pretexto para achegar a súa palabra poética a través dos recursos escénicos e dramatúrxicos do teatro de monicreques. Na obra, o propio Manuel María transfórmase en monicreque para interactuar cos nenos, e ten ademáis unha forte presenza musical, grazas á cal poemas como O Soñador, Galicia ou O Río convértense en cancións.

Durante este período de programación especial dedicada ás Letras Galegas 2016, distribuíronse uns marcapáxinas conmemorativos con textos de Manuel María e recursos de interese para coñecer a súa obra.

marc1 marc2

 

FÍOS DO QUERER, OBRADOIRO-CONCERTO DE MÚSICA INFANTIL

O Servizo de Normalización Lingüística organiza unha nova actividade dentro do programa APEGO, destinado á xente máis miúda da casa: FÍOS DO QUERER.

Trátase dun obradoiro-concerto que chega da man de César Freiría (Cé orquestra pantasma) con cancións para meniños e meniñas de 0 a 3 anos e para gozar en familia.

Haberá dúas sesións:

  • 24 de abril, ás 12:00 h, na Sociedade Labrego Cultural de Reboreda.

  • 15 de maio, ás 18:00 h, no Centro Cultural de Cesantes.

A actividade é de balde pero cómpre inscrición previa, que deberá formalizarse en normalizacion@redondela.es ou no teléfono 986 400 106.

Sin título-1

Continúe lendo FÍOS DO QUERER, OBRADOIRO-CONCERTO DE MÚSICA INFANTIL