Suspendidos os cursos CELGA en Redondela

Os cursos de lingua galega CELGA 2 (en Redondela) e CELGA 4 (en Chapela), solicitados por este SNL á Secretaría Xeral de Política Lingüística,  quedaron sen adxudicación, segundo a resolución publicada pola xefatura territorial.

Por este motivo as persoas pre-inscritas nos mesmos non poderán facelos en Redondela.

Para buscar outras alternativas pódese consultar a páxina da SXPL onde aparecen os cursos programados.

 

 

Cursos CELGA e linguaxe administrativa nas EOI

O Diario Oficial de Galicia de hoxe (DOG Núm. 159, do 22 de agosto de 2012), publica a orde pola que se convocan cursos de linguaxe administrativa galega e cursos preparatorios para os certificados de lingua galega CELGA, nas escolas oficiais de idiomas de Galicia.

O prazo para presentar as solicitudes remata o día 10 de setembro de 2012, e as solicitudes deberán presentarse na propia EOI onde se queira facer o curso.

Pódese consultar aquí a CONVOCATORIA.

Nas EOI máis próximas a Redondela (Vigo e Pontevedra), ofrecen os seguintes cursos:

CURSOS DE LINGUAXE ADMINISTRATIVA

EOI

Nivel

Datas

Horarios

Días

Vigo Medio Setembro – Decembro 2012 10.30-13.00 Martes e xoves
Vigo Medio Outubro 2012 – Xaneiro 2013 17.30-20.00 Mércores e venres
Vigo Superior Outubro 2012 – Xaneiro 2013 9.00-11.30 Mércores e venres
Vigo Superior Setembro – Decembro 2012 17.30-20.00 Martes e xoves
Pontevedra Medio Outubro 2012 – Xaneiro 2013 9.00-12.00 Martes e venres
Pontevedra Medio Outubro 2012 – Xaneiro 2013 16.30-18.30 Luns, mércores e xoves
Pontevedra Superior Outubro 2012 – Xaneiro 2013 9.00-12.00 Martes e venres
Pontevedra Superior Outubro 2012 – Xaneiro 2013 16.30-18.30 Luns, mércores e xoves

CURSOS PREPARATORIOS PARA OS CELGA

EOI

Nivel

Datas

Horarios

Días

Vigo CELGA 2 Outubro – Decembro 2012 11.30-14.00 Luns e mércores
Vigo CELGA 3 Setembro – Decembro 2012 10.30-13.00 Martes e xoves
Vigo CELGA 3 Outubro 2012 – Xaneiro 2013 17.30-20.00 Mércores e venres
Vigo CELGA 4 Outubro 2012 – Xaneiro 2013 17.30-20.00 Luns e xoves
Pontevedra CELGA 2 Outubro – Decembro 2012 18.30-20.3020.00-21.3018.30-21.00 MartesMércoresXoves

Curso CELGA 1 en liña

A Secretaría Xeral de Política Lingüística vén de convocar unha nova edición do curso en liña do nivel CELGA 1,  dirixido a aquelas persoas maiores de 16 anos que teñan coñecementos informáticos a nivel de usuario e que estean interesadas en realizar a proba para obter esa certificación.

O prazo de inscrición remata o 14 de marzo, e o curso desenvolverase do 26 de marzo ao 1 de xuño de 2012.

As probas para a obtención da correspondente certificación celebraranse en Santiago de Compostela, Madrid, Barcelona e Ponferrada o 10 de xuño.

As persoas que desexen matricularse deberán enviar un correo electrónica ao enderezo sxpl.formacion@xunta.es cos seus datos,  enderezo electrónico,  teléfono de contacto,  lugar de residencia e mais o nivel de estudos.

Pódese consultar aquí a CONVOCATORIA.

Curso CELGA 4 en Redondela

A Secretaria Xeral de Política Lingüística vén de conceder un dos dous cursos CELGA solicitados para o Concello de Redondela.

O vindeiro luns, 12 de marzo, comezarán as clases do curso preparatorio para a obtención do  CELGA 4 en Redondela. A actividade formativa desenvolverase os luns, mércores e xoves, de 20.00 a 22.00 horas, na Sala infantil da Biblioteca, situada no primeiro andar do Multiusos da Xunqueira, en Redondela.

A asistencia ás clases está limitada, inicialmente, ás persoas que fixeron a súa inscrición nas datas fixadas anteriormente.

De haber algunha outra persoa interesada poderá solicitar a súa inclusión nunha lista de agarda, por se se produciran vacantes, no Servizo de Normalización Lingüística (na planta baixa da Casa do Concello), ou a través do correo electrónico normalizacion@redondela.info

 O curso preparatorio para o CELGA 2  queda fóra da programación por falta de dotación orzamentaria.

Curso de toponimia

O IEM (Instituto de Estudos Miñoranos) e os concellos de Vigo, Pontevedra e Ourense, en colaboración coa Universidade de Vigo, organizan o Curso de formación de especialistas en toponimia, que se celebrará durante o mes e marzo en Vigo, Pontevedra e Gondomar.

O obxectivo é formar especialistas en recollida da toponimia, para contribuír a recuperar esta parte tan importante do noso patrimonio cultural e lingüístico.

Desenvolverase  os días: 2, 3, 9, 10, 16, 17, 23 e 24 de marzo de 2012.

Dende hoxe e ata o 22 de febreiro estará aberta a inscrición para as persoas interesadas, que deberán formalizar a súa matrícula enviando o currículo ao enderezo electrónico:  oficina@minhor.org. O límite de prazas é de 40 persoas, e ten un prezo de 30 € para persoas traballadoras e 15 € para desempregadas ou estudantes.

O curso desenvolverá distintos aspectos de interese no estudo e recollida da toponimia, e nel intervirán persoas expertas na materia como Gonzalo Navaza, Ana Isabel Boullón, Vicente Feixóo, Roberto Rodríguez, Emili Casanova, Xosé Henrique Costas, Xosé Lois Vilar, Lorena Carrasco, Anxo Rodríguez, Dolores Ferro, Xosé Manuel Souto, Alberto Rodríguez, Xesús Saavedra, Xesús Costas, Marcial Rodríguez, Luís Bará, Marta Souto, Luz Méndez, Xavier Gomila, Pilar Barreiro e Xulia Marqués.

O Concello de Redondela participa como entidade colaboradora.

Tríptico con ficha de inscrición en pdf

Inscrición nas probas para a obtención dos CELGA

O Diario Oficial de Galicia publica hoxe (DOG núm. 11, martes, 17 de xaneiro de 2012) a convocatoria de probas para a obtención dos certificados de lingua galega, niveis CELGA 1, 2, 3 e 4, no ano 2012.

Pódense inscribir nas mesmas as persoas maiores de 16 (ou que os cumpran en 2012), logo de pagar as correspondentes taxas de dereitos de exame (15.61 €).

As probas desenvolveranse nas cidades de Santiago de Compostela, A Coruña, Lugo, Ourense e Vigo, nas seguintes datas:

CELGA 4: 2 de xuño de 2012

CELGA 2: 3 de xuño de 2012

CELGA 3: 9 de xuño de 2012

CELGA 1: 10 de xuño de 2012

 O prazo para realizar a inscrición remata o 3 de abril de 2012.

As persoas interesadas poden dirixirse ao Servizo de Normalización Lingüística para solicitar información e o impreso de solicitude.

Inscrición nos cursos CELGA

O Servizo de Normalización Lingüística do Concello de Redondela abre o prazo de inscrición para as solicitudes de cursos de lingua galega para persoas adultas.

A Secretaría Xeral de Política Lingüística vén de publicar a convocatoria de cursos de lingua galega preparatorios para as probas dos niveis CELGA 1, CELGA 2, CELGA 3 e CELGA 4, para particulares e colectivos de Galicia (DOG núm. 5, do 9 de xaneiro de 2012).

O Servizo de Normalización Lingüística do Concello de Redondela vai solicitar que algún destes cursos se poidan desenvolver no noso concello, para o que pide a todas aquelas persoas interesadas que se dirixan ao SNL a través do enderezo electrónico normalizacion@redondela.info ou do teléfono 986 400300, para consultar cantas dúbidas teñan a este respecto e para realizar a súa inscrición.

O prazo para realizar a solicitude remata o vindeiro 26 de xaneiro, e na petición deberán constar os seguintes datos: nome completo, DNI, número de teléfono de contacto e nivel de coñecemento da lingua galega que posúen, ou o curso CELGA que desexan facer.

A celebración de cursos no Concello de Redondela dependerá de que haxa un número suficiente de inscricións, polo que dende o SNL anímase a toda a cidadanía que queira mellorar a súa competencia en lingua galega a que solicite esta actividade formativa. En función da demanda poderanse solicitar un ou máis cursos de diferentes niveis.

Os cursos son de acceso libre e gratuíto, e desenvolveranse entre mediados de marzo e o 30 de maio, nos horarios que mellor conveñan á maioría das persoas inscritas.

Tamén existe a posibilidade de asistir a algún dos cursos convocados xa noutras poboacións (as máis próximas son Vigo e Pontevedra), e para solicitalos as persoas interesadas poderán facer unha solicitude individual (segundo o anexo I da convocatoria). E se algún colectivo ou asociación quere solicitar un curso para un grupo de persoas (entre 20 e 30) deberá cubrir a solicitude correspondente ao anexo II.

O texto íntegro da convocatoria pódese consultar na seguinte ligazón.

 Para máis información poden contactar co SNL, na Casa do Concello (Rúa Alfonso XII, 2), ou no teléfono 986 400300.

 

Congresos e xornadas sobre a lingua

Dentro do PROXECTO CAMIÑO DAS CULTURAS E DAS LINGUAS, do que xa falamos anteriormente, vaise desenvolver os vindeiros 21 e 22 de outubro, no Museo Pedagóxico de Galicia (MUPEGA), o congreso “As linguas e culturas do Camiño de Santiago de Compostela: presente e futuro“.

Este simposio centra a súa actividade arredor da historia común das linguas e culturas das diferentes rexións de Europa, apreciando o pasado común para proxectarse conxuntamente cara ao futuro. No proxecto, xunto  con outras institucións de diversos territorios de España e de Europa, colabora a Secretaría Xeral de Política Lingüística, dentro do programa Cultura 2007-2013 da Unión Europea.

A asistencia é de balde. Pódese obter máis información nesta ligazón.

Por outro lado, e seguindo con xornadas sobre a lingua, a Facultade de Ciencias da Educación da Coruña acolle as IV Xornadas sobre normalización da lingua e a cultura no ámbito da educación, que terán lugar os días 7, 8, 14 e 15 de novembro, co subtítulo: EDUCANDO EN GALEGO, A NOSA RESPONSABILIDADE.

Baixo o título de “Tour de lecturas do oeste” o Salón de Graos desta facultade acollerá esta edición centrada na dinamización a través da lectura. A participación nestas xornadas é de balde e hai un total de 75 prazas, que se cubrirán por orde de inscrición,  no Decanato da Facultade.

Podes consultar aquí o PROGRAMA.

Ademais, entre o 30 de novembro e o 1 de decembro, o Parninfo da Reitoría da Universidade da Coruña acolle, un ano máis, as Xornadas sobre lingua e usos, centradas nesta edición na ECOLINGÜÍSTICA, que organiza o SNL da Univ. da Coruña en colaboración coa RAG.

A inscrición é gratuíta e pódese facer ata o 25 de novembro.

Descarga aquí o programa.

Cursos de linguaxe administrativa para persoal da administración local

A EGAP (Escola Galega de Administración Pública), en colaboración coa Secretaría Xeral de Política Lingüística, convocou cursos de linguaxe administrativa galega para o persoal das administracións locais de Galicia.

Os cursos convocados inclúen 5 edicións de linguaxe administrativa de NIVEL MEDIO, na modalidade de TELEFORMACIÓN, e outras 5 edicións de linguaxe administrativa de NIVEL SUPERIOR, na modalidade PRESENCIAL.

O prazo de presentación de solicitudes remata o 13 de abril, e poderase facer a través do enderezo elctrónico

http://egap.xunta.es/matrícula

Pódese consultar a convocatoria completa na seguinte ligazón.

Curso CELGA 3 en Redondela

O Servizo de Normalización Lingüística do Concello de Redondela informa que o vindeiro luns, 4 de abril de 2011, comezará a desenvolverse un curso de lingua galega CELGA 3 en Redondela.

Este curso inclúese  dentro da convocatoria de cursos para colectivos de Galicia, da Secretaría Xeral de Política Lingüística, e está destinado a todas aquelas persoas que desexen acadar ou mellorar a súa competencia en lingua galega, partindo duns coñecementos básicos, ou que queiran presentarse ás probas para a obtención do certificado do nivel de coñecemento da lingua galega CELGA 3.

O curso desenvolverase de luns a xoves, na sala infantil da biblioteca no Multiusos da Xunqueira, en horario de 20.00 a 22.00 horas, e é gratuíto.

As persoas interesadas en facelo, e que non estean inscritas con anterioridade no mesmo, poderán realizar a súa reserva de praza no Servizo de Normalización Lingüística (na planta baixa da Casa do Concello), no teléfono 986 402842, ou a través do correo electrónico normalizacion@redondela.info