NOVA DIFUSIÓN DO APEGO, AGORA XA EN 23 CONCELLOS

Coa recente adhesión dos concellos da Coruña, Ames, Mazaricos, Moaña, Muros, Oleiros, Ponteceso, Rianxo, Ribadeo, Teo e Vimianzo, ao programa Apego, chega agora o momento de comezar a traballar coas familias interesadas en incorporar o galego á crianza das súas fillas e fillos.

Estes once concellos súmanse aos doce que puxeron en marcha a iniciativa en 2015 (A Baña, Carballo, Carnota, Ferrol, Narón, Negreira, Ourense, Pontevedra, Redondela, Rois, Santiago e Vigo) co impulso inicial da Coordinadora de Traballadores/as de Normalización da Lingua (CTNL). Grazas a esta colaboración intermunicipal, a poboación atinxida polo programa Apego supera xa o millón de habitantes.

Coas novas incorporacións, Apego está xa producindo novos recursos, nesta ocasión materiais audiovisuais para a súa difusión nas redes. O primeiro deles é un vídeo para transmitir os obxectivos do proxecto, explicar o funcionamento ás persoas que desexen sumarse e divulgar o programa de xeito atractivo.

O Apego mantense desde os servizos de normalización dos concellos participantes, a onde se poden dirixir as persoas que desexen máis información ou sumarse á comunidade de usuarias.

O programa procura aumentar a porcentaxe de nenos e nenas que reciben o galego desde o berce e arroupar o seu uso no seu proceso de socialización ata os 6 anos. Dentro das accións que se realizan, a máis coñecida xa é a entrega de cadansúa caixa con información e recursos en galego ás familias que acceden a formar parte da comunidade do programa. A partir desa adhesión, reciben periodicamente información e propostas para que os seus fillos e fillas se acheguen á lingua e á cultura galegas con naturalidade desde as primeiras idades. Para lograr isto, ademais dos espazos na rede onde se facilitan recursos (www.apego.gal e www.facebook.com/apego.gal), varios concellos publican materiais específicos para divulgar a oferta de actividade infantil e tamén reforzan a programación con convocatorias nas que as nenas e nenos podes gozar, aprender e relacionarse na nosa lingua.

O Servizo de Normalización Lingüística do Concello de Redondela está na planta baixa do multiúsos da Xunqueira. Tamén se pode contactar a través do correo electrónico normalizacion@redondela.es ou no teléfono 986400106.

Mapas coa toponimia de Negros e Saxamonde

Comeza a exposición pública dos mapas coa toponimia recollida nas parroquias de Negros e Saxamonde.

O traballo de recollida da toponimia redondelá iniciouse en 2012, froito da celebración dun curso de toponimia organizado polo IEM (Instituto de Estudos Miñoranos), a Universidade de Vigo e os Concellos de Vigo e Pontevedra, no que participou o Servizo de Normalización Lingüística. Daquela comezouse cos traballos de campo en Saxamonde e Negros, e realizouse a recollida da microtoponimia e a súa xeorreferenciación. Con esa información traspasáronse agora os datos aos mapas que van ser expostos nos centros culturais de Chan das Pipas (en Saxamonde), e no Centro cultural e veciñal de Negros.

O obxectivo desta exposición pública é facilitar á veciñanza destas dúas parroquias que poida comprobar se os nomes recollidos son correctos e se están ben localizados nos mapas. Deste xeito a veciñanza poderá corrixir ou completar a información recollida, para o que se disporá tamén dun formulario onde rexistrar os comentarios e emendas.

O rexistro desta valiosa información é fundamental para evitar que se perda ese rico patrimonio, que nos transmite información da historia, dos usos e costumes, e dos lugares máis significativos de cada territorio, dende os nomes dos camiños e corredoiras, pasando polas terras de cultivo, o monte, os ríos e regatos, até construcións singulares e comunitarias como cruceiros, fontes ou lavadoiros.

Os mapas estarán a disposición da veciñanza dende o 18 de decembro até o 31 de xaneiro no horario habitual de apertura de cada centro cultural.

Amplíase o prazo de inscrición nas probas CELGA 2013

A Secretaría Xeral de Política Lingüística (SXPL) vén de ampliar o prazo de inscrición nas probas para o obter os certificados de lingua galega  CELGA 2013 ata o 8 de abril inclusive.

As persoas que vaian presentarse a esas probas teñen, ademais, a posibilidade de formarse a través da rede, descargando os distintos manuais que a SXPL pon a disposición das persoas interesadas.

Pódense descargar dende as seguintes ligazóns:

CELGA 1
CELGA 2
CELGA 3
CELGA 4

 

Suspendidos os cursos CELGA en Redondela

Os cursos de lingua galega CELGA 2 (en Redondela) e CELGA 4 (en Chapela), solicitados por este SNL á Secretaría Xeral de Política Lingüística,  quedaron sen adxudicación, segundo a resolución publicada pola xefatura territorial.

Por este motivo as persoas pre-inscritas nos mesmos non poderán facelos en Redondela.

Para buscar outras alternativas pódese consultar a páxina da SXPL onde aparecen os cursos programados.

 

 

Taboleiro do libro galego

O profesor, escritor, tradutor e crítico literario Ramón Nicolás vén de inaugurar un novo apartado no seu  sitio web para divulgar o libro galego.

O TABOLEIRO DO LIBRO GALEGO é un proxecto de divulgación do libro galego en colaboración con 12 librarías de diferentes localidades do país (de Vigo, Pontevedra, Lugo, Ourense,  Allariz,  Arteixo e  Compostela), no que compón unha listaxe semanal das obras máis vendidas nas nosas letras, clasificadas por xéneros e en distintas categorías (narrativa, poesía, ensaio-teatro, literatura infantil e xuvenil, banda deseñada e mais álbum ilustrado).

As librarías achegan os datos para elaborar estas listaxes que servirán para manter informados os potenciais lectores e achegarlles información a través de ligazóns sobre cada libro ou edición.

Unha boa iniciativa coa que poderemos estar informados e aprenderemos o que se coce nas editoriais galegas.

Probas para a obtención dos Celga en 2013

A Secretaría Xeral de Política Lingüística publicou a convocatoria de probas para a obtención dos Certificados de lingua galega (Celga) en 2013. O prazo de matrícula está aberto até o 3 de abril.
Celga

PERSOAS DESTINATARIAS
Maiores de 16 anos

PRAZO DE INSCRICIÓN
Até o 3 de abril de 2013

DATAS DAS PROBAS
>Celga 1: 9 de xuño
>Celga 2: 2 de xuño
>Celga 3: 8 de xuño
>Celga 4: 1 de xuño

LUGARES DOS EXAMES
-Celga 1: Santiago de Compostela, Barcelona, Madrid e Ponferrada
-Celga 2, 3 e 4: Santiago de Compostela, A Coruña, Lugo, Ourense, Vigo, Barcelona, Madrid e Ponferrada

TAXA ÚNICA
15,61 €

Convocatoria completa (DOG do 16/1/13 .pdf) >

Impreso para o pagamento das taxas >

Códigos para cubrir a folla de taxas (.pdf)>

Modelo de solicitude>

Convocatoria de cursos preparatorios para as probas dos Celga

Convocatoria de cursos CELGA

O Servizo de Normalización Lingüística do Concello de Redondela abre o prazo de inscrición para solicitar cursos de lingua galega para persoas adultas, logo da convocatoria efectuada pola Secretaría Xeral de Política Lingüística (DOG núm. 4, do 7 de xaneiro de 2013), na que convoca cursos preparatorios para as probas dos niveis CELGA 1, CELGA 2, CELGA 3 e CELGA 4, para particulares e colectivos de Galicia.

Para tentar organizar algún destes cursos no noso concello, O Servizo de Normalización Lingüística do Concello de Redondela anima a todas aquelas persoas interesadas que se dirixan ao SNL a través do enderezo electrónico normalizacion@redondela.info ou do teléfono 986 400300, para consultar cantas dúbidas teñan a este respecto e para realizar a súa inscrición.

O prazo para facer as solicitudes para Redondela remata o 23 de xaneiro, e na petición deberán constar os seguintes datos: nome completo, DNI, número de teléfono de contacto, curso CELGA que desexan facer e parroquia onde residen.

A celebración destes cursos en Redondela dependerá de que haxa un número suficiente de solicitudes, polo que dende o SNL anímase a toda a cidadanía que queira mellorar a súa competencia en lingua galega a que solicite esta actividade formativa. Os cursos son de acceso libre e gratuíto, e desenvolveranse entre mediados de marzo e o 30 de maio, nos horarios que mellor conveñan á maioría das persoas inscritas.

Tamén existe a posibilidade de asistir a algún dos cursos de programación directa, convocados xa para Vigo e Pontevedra, para os que haberá que facer unha solicitude individual (segundo o anexo I da convocatoria). E se algún colectivo ou asociación quere solicitar un curso para un grupo de persoas (entre 20 e 30) deberá cubrir a solicitude correspondente ao anexo II.

CURSOS DE PROGRAMACIÓN DIRECTA PREPARATORIOS PARA OS CELGA 2013

Cidade

Lugar

Nivel

Datas

Horarios

Días

Pontevedra Edificio Xunta CELGA 1 18/03/2013 – 30/05/2013 17.00 – 19.30 De luns a xoves
Pontevedra Edificio Xunta CELGA 2 18/03/2013 – 30/05/2013 10.00 – 12.30 De luns a xoves
Pontevedra Edificio Xunta CELGA 2 18/03/2013 – 30/05/2013 16.00 – 18.30 De luns a xoves
Pontevedra EOI CELGA 3 5/03/2013 – 21/05/2013 9.00 – 12..00 Martes e venres
Pontevedra EOI CELGA 3 5/03/2013 – 23/05/2013 Tardes (dif. horas) Martes, mércores e xoves
Pontevedra EOI CELGA 4 5/03/2013 – 21/05/2013 9.00 – 12..00 Martes e venres
Pontevedra Edificio Xunta CELGA 4 18/03/2013 – 30/05/2013 10.00 – 12..30 De luns a xoves
Pontevedra Edificio Xunta CELGA 4 18/03/2013 – 30/05/2013 18.30 – 21..00 De luns a xoves
Vigo EOI CELGA 1 28/02/2013 – 30/05/2013 10.30 – 13.00 Martes e xoves
Vigo IES Alexandre Bóveda CELGA 1 18/02/2013 – 30/05/2013 18.30 – 21.00 Luns e xoves
Vigo EOI CELGA 2 25/02/2013 – 29/05/2013 11.30 – 14.00 Luns e mércores
Vigo EOI CELGA 2 28/02/2013 – 30/05/2013 17.30 – 20.00 Martes e xoves
Vigo IES Alexandre Bóveda CELGA 2 18/03/2013 – 30/05/2013 18.30 – 21.00 Luns e xoves
Vigo EOI CELGA 3 28/02/2013 – 30/05/2013 10.30 – 13.00 Martes e xoves
Vigo EOI CELGA 3 27/02/2013 – 31/05/2013 17.30 – 20.00 Mércores e venres
Vigo CEFORE CELGA 4 18/03/2013 – 30/05/2013 10.00 – 12.30 De luns a xoves
Vigo EOI CELGA 4 28/02/2013 – 30/05/2013 17.30 – 20.00 Martes e xoves
Vigo IES Alexandre Bóveda CELGA 4 18/03/2013 – 30/05/2013 18.30 – 21.00 Luns e xoves

 O texto íntegro da convocatoria pódese consultar na seguinte ligazón:

http://www.xunta.es/dog/Publicados/2013/20130107/AnuncioG0164-020113-0001_gl.pdf

Para máis información poden contactar co SNL, no primeiro andar da Casa do Concello (Rúa Alfonso XII, 2), ou no teléfono 986 400300 (Ext. 247).

Concurso de decoración de Nadal, O NOSO VENDE

A campaña de galeguización e dinamización do comercio local O NOSO VENDE, iniciada en decembro de 2011, continúa este ano cunha nova actuación.

O NOSO VENDE é un proxecto de dinamización comercial e lingüística que pretende incidir na sensibilización sobre o uso da lingua galega no comercio local, para ampliar os espazos de uso e para estimular a actividade do comercio redondelán. Está promovido polo Servizo de Normalización Lingüística e Radio Redondela, dependentes da Concellería de Cultura, a Concellería de Desenvolvemento Local e a Asociación de Empresarios de Redondela.

Neste Nadal o programa continúa a súa andaina coa convocatoria do II Concurso de escaparates de Nadal no comercio redondelán, que incidirá na promoción dos produtos que ofrecen a través do uso da lingua galega e na elaboración de escaparates atractivos coa decoración de Nadal.  Os comercios participantes deberán incluír algún lema específico para motivar a súa clientela a que merque os seus produtos, e implica que poñerán a súa publicidade, os rótulos e os prezos, así como os carteis de descontos, ofertas especiais ou bos desexos para as festas, tanto dentro coma fóra do local, en lingua galega.

Para levar adiante esta promoción contarán coa colaboración do SNL que corrixirá, traducirá ou asesorará as súas propostas.

O concurso desenvolverase, nesta edición, a través da red social Facebook, na que se habilitará un perfil para subir as fotos dos establecementos participantes e na que se fará unha votación pública aberta a toda a cidadanía.

O prazo para realizar a inscrición remata o día 20 de decembro de 2012, e as persoas participantes na votación entrarán no sorteo dun vale de compra no comercio redondelán por valor de 100 €.

BASES DO CONCURSO

Navega en galego!

Navegar significa desprazarse, tanto pola auga coma polo aire ou o espazo. E alén destes significados ten tamén o significado máis moderno de desprazarse pola rede.

Mais cando nos servimos da tecnoloxía informática para buscar ou compartir información tamén podemos escoller as nosas preferencias. E entre elas temos a opción de utilizar a nosa lingua e facer que o resto do mundo o saiba.

O navegador da Internet “fala” por nós, porque  aínda que  falemos galego, por defecto e como regra xeral, utiliza o español. Por iso é importante configurar o noso navegador de tal xeito que a nosa lingua sexa o idioma preferente. E isto pode facerse seguindo unhas sinxelas instrucións, que nos ofrecen dende o sitio NAVEGA EN GALEGO.
Na propia web explícannos a vantaxes de poñeres o galego como preferido no navegador:

  1. Influirás para que se creen versións en galego das webs.
  2. Sairanche as webs multilingües no idioma do país.
  3. Potenciarás as buscas na Galipedia.
  4. Baixarás os programas multilingües en galego.
  5. E impulsarás o emprego na terra.
Se o galego é a túa lingua, fálao tamén na web!
E de paso podes tamén poñer o teu móbil en galego.

Día da ciencia e da tecnoloxía en galego

Hoxe celebramos o Día da Ciencia e da Tecnoloxía en Galego.

A raíz da celebración instituída pola UNESCO en 2001, que decidiu declarar o 10 de novembro como Día Mundial da Ciencia para a Paz e o Desenvolvemento, para promover a utilización responsable da ciencia en beneficio das sociedades, dende hai tres anos, os centros educativos galegos celebran o día de hoxe como Día da Ciencia e da Tecnoloxía en Galego. O obxectivo  desta efeméride é o de mostrar que a lingua galega é útil para facer ciencia e, no ámbito académico, para impartir as materias científico-técnicas.

Este ano a IGACIENCIA (Institución Galega de Ciencia) propuxo centrar a celebración na tecnoloxía e nas figuras de Leonardo da Vinci e mais do galego Ramón Verea, inventor, entre outras cousas, dunha das primeiras calculadoras.

Nas ligazóns de máis arriba e na páxina da CGENDL (Coordinadora Galega de Equipos de Normalización e Dinamización Lingüística) pódense atopar múltiples recursos e propostas para celebrar o O DEREITO A GOZAR DA CIENCIA EN GALEGO. Ademais pódese obter toda a información na páxina da SXPL (Secretaría Xeral de Política Lingüística), e premendo nas imaxes de abaixo as propostas tecnolóxicas desta celebración: as instrucións para construír a PONTE DESMONTABLE DE LEONARDO DA VINCI e a biografía do escritor e científico galego RAMÓN VEREA.

Entre os recursos sobre ciencia e tecnoloxía destacamos hoxe o ÁLBUM DA CIENCIA,  do CCG (Consello da Cultura Galega), que nos axudará a coñecer os máis senlleiros científicos galegos.