Linguaxe xurídica e administrativa, autoaprendizaxe

Xa é posible formarse en liña sobre linguaxe xurídica e administrativa galega. A Secretaría Xeral de Política Lingüística divulgou  materiais autoformativos en linguaxes administrativa e xurídica galegas, accesibles para toda a cidadanía,  co obxectivo de mellorar a calidade da oralidade e dos textos escritos na Administración.

Esta formación específica vai dirixida inicialmente ao persoal ao servizo das administracións públicas de Galicia, mais tamén a todas as persoas interesadas en ampliar os coñecementos nestas materias e mellorar a súa competencia lingüística.

Estes novos recursos en liña ofrecen dous cursos de autoaprendizaxe de nivel medio das seguintes linguaxes específicas (pódese acceder premendo no título):

CURSO MEDIO DE LINGUAXE XURÍDICA

CURSO MEDIO DE LINGUAXE ADMINISTRATIVA

Inclúen contidos teóricos, exercicios de autorresolución e recursos varios (vocabulario, glosarios de termos, lexislación, videoteca, hemeroteca…) que complementan a formación.

Pódese consultar toda a información na web da SXPL.

O galego, chave para os teus negocios no mundo

A Secretaría Xeral de Política Lingüística xunto á FEGAPE, Federación Galega de Parques Empresariais, lanzan a campaña “O galego, chave para os teus negocios no mundo”, que  promove a utilización do galego como lingua dos negocios, tanto dentro coma fóra de Galicia.

A nosa lingua, o galego, é un valor cultural que nos identifica como pobo, mais tamén serve para nos conectar cunha comunidade de case 200 millóns de persoas que falan portugués, a nosa lingua irmá, o que nos permite comunicarnos e comprendernos sen necesidade de mediación. Pero este valor cultural transfórmase agora tamén en valor económico cando falamos de negocios e de elementos tan importantes para estes como a comunicación.

Por este motivo a campaña incide nas facilidades que a comunicación en galego nos dá para traballar e intercomunicarnos con países emerxentes, que poden ser motores de desenvolvemente industrial e económico tamén para o noso.

Pódese ver aquí toda a información desta campaña, e premendo na imaxe superior o díptico de promoción.

26 de setembro, Día Europeo das Linguas

Hoxe é o Día Europeo das Linguas – European Day of Languages (EDL)-, que se vén celebrando dende o ano 2001 por iniciativa do Consello de Europa en Estrasburgo.

Os 47 estados membros do Consello de Europa  animan, deste xeito, a máis de 800 millóns de europeos a aprender máis linguas a calquera idade, dentro e fóra da escola. O obxectivo desta celebración é promover o plurilingüismo, pois a diversidade lingüística é unha ferramenta necesaria para acadar unha maior  comprensión intercultural e un elemento clave na rica herdanza cultural do noso continente.

Pódese participar nesta celebración a través de diferentes actividades que propón o Consello de Europa,  e máis información a través da páxina da SXPL: DÍA EUROPEO DAS LINGUAS.

AS LINGUAS ABREN PORTAS!

Cursos CELGA e linguaxe administrativa nas EOI

O Diario Oficial de Galicia de hoxe (DOG Núm. 159, do 22 de agosto de 2012), publica a orde pola que se convocan cursos de linguaxe administrativa galega e cursos preparatorios para os certificados de lingua galega CELGA, nas escolas oficiais de idiomas de Galicia.

O prazo para presentar as solicitudes remata o día 10 de setembro de 2012, e as solicitudes deberán presentarse na propia EOI onde se queira facer o curso.

Pódese consultar aquí a CONVOCATORIA.

Nas EOI máis próximas a Redondela (Vigo e Pontevedra), ofrecen os seguintes cursos:

CURSOS DE LINGUAXE ADMINISTRATIVA

EOI

Nivel

Datas

Horarios

Días

Vigo Medio Setembro – Decembro 2012 10.30-13.00 Martes e xoves
Vigo Medio Outubro 2012 – Xaneiro 2013 17.30-20.00 Mércores e venres
Vigo Superior Outubro 2012 – Xaneiro 2013 9.00-11.30 Mércores e venres
Vigo Superior Setembro – Decembro 2012 17.30-20.00 Martes e xoves
Pontevedra Medio Outubro 2012 – Xaneiro 2013 9.00-12.00 Martes e venres
Pontevedra Medio Outubro 2012 – Xaneiro 2013 16.30-18.30 Luns, mércores e xoves
Pontevedra Superior Outubro 2012 – Xaneiro 2013 9.00-12.00 Martes e venres
Pontevedra Superior Outubro 2012 – Xaneiro 2013 16.30-18.30 Luns, mércores e xoves

CURSOS PREPARATORIOS PARA OS CELGA

EOI

Nivel

Datas

Horarios

Días

Vigo CELGA 2 Outubro – Decembro 2012 11.30-14.00 Luns e mércores
Vigo CELGA 3 Setembro – Decembro 2012 10.30-13.00 Martes e xoves
Vigo CELGA 3 Outubro 2012 – Xaneiro 2013 17.30-20.00 Mércores e venres
Vigo CELGA 4 Outubro 2012 – Xaneiro 2013 17.30-20.00 Luns e xoves
Pontevedra CELGA 2 Outubro – Decembro 2012 18.30-20.3020.00-21.3018.30-21.00 MartesMércoresXoves

Avelino Pousa Antelo, in memoriam

No día de onte faleceu Avelino Pousa Antelo (A Baña, 1914 – Teo, 2012), mestre, intelectual, agrarista, político, escritor e galeguista, que traballou arreo pola mellora e dignificación de Galicia. Un exemplo de vida, de traballo e entusiasmo para as xeracións futuras que non se debería esquecer.

Dende aquí queremos sumarnos ás múltiples mostras de afecto e manifestar o noso pesar polo seu pasamento.

A seguir incluímos un vídeo no que Don Avelino fala do “ser galego” e algunhas ligazóns de interese que se están a publicar nos distintos medios.

Achegas:

Cultura Galega.org

ProLingua: “Avelino Pousa Antelo, lembranzas persoais

Praza Pública: “Avelino Pousa Antelo, o mestre de Galicia

De Luns a Venres

Sermos Galiza: “Avelino Pousa Antelo, memoria e futuro

Manuel Bragado en Faro de Vigo: “Mestre Don Avelino

AELG (Asociación de Escritores en Lingua Galega): Comunicado

 

Voltará da aurora / a luz temerosa, / e,na Patria nosa / voltará a brilar / a branca bandeira / co azul do ceo / ó compás do vento, / ¡ doce libertá ! / E nos nosos peitos, / e nas nosas vidas, / espranzas fuxidas / que retornarán, / encherán a Terra, / encherán os ventos / con novos alentos / na terra e no mar”.

Avelino Pousa Antelo

Menús en galego con tecnoloxía dixital

O Servizo de Normalización Lingüística da CEG (Confederación de Empresarios de Galicia), vén de divulgar unha aplicación terminolóxica  dixital que pretende facilitar a hostaleiros e restauradores a exhibición dos seus menús en lingua galega.

Esta terminoloxía dixital para a hostalaría inclúe máis de 300 receitas de pratos en castelán coa súa equivalencia en galego. Deste xeito convértese nunha ferramenta útil e áxil para aqueles establecementos que opten por expoñer os seus menús ou cartas na nosa lingua, contribuíndo así dun xeito determinante á normalización da lingua galega.

A aplicación é de acceso libre e gratuíto, e está dispoñible na seguinte ligazón.

Para os establecementos hostaleiros redondeláns segue aberta a campaña A lingua máis saborosa, promovida dende este SNL, de preferiren unha atención máis especializada.

 

 

 

 

Manual de estilo do DOG

A Xunta de Galicia vén de publicar o Manual de estilo para o Diario Oficial de Galicia e outras publicacións institucionais, que responde a unha encomenda normativa derivada da propia existencia do DOG e á necesidade de unificar unhas pautas de estilo claras e ao alcance de todas as persoas usuarias.

Deste xeito preténdese unificar criterios para elaborar documentos oficiais, que atinxen ás formas lingüísticas e aos aspectos formais de edición e redacción, co obxectivo de producir documentos de calidade e entendibles por toda a cidadanía. Dende agora estas serán as normas de referencia para as publicacións institucionais en formato papel ou electrónico, os contidos das páxinas web dos distintos departamentos da Xunta de Galicia, os gabinetes de comunicación do goberno galego e os manuais formativos.

O manual está editado nun formato wikimedia, que permite que os seus contidos se poidan modificar e actualizar permanentemente. Deste xeito, aínda que  non se ofrecen unha ortografía nin unha gramática completas (xa fixadas en obras específicas), ofrece normas concretas para aplicar ao DOG e a outras publicacións institucionais, con casos específicos e exemplos prácticos sobre a norma e as excepcións. Así pódense consultar dende algunhas construcións gramaticais dubidosas ou erróneas, as interferencias lingüísticas entre o galego e mais o castelán, a correcta utilización da toponimia, ou as abreviacións máis frecuentes.

Un bo recurso para refrescar a memoria e actualizármonos.

CONSUMOGUSTOS, produtos do país na lingua do país

Unha nova iniciativa a prol da nosa lingua busca promover a etiquetaxe na nosa lingua dos produtos galegos.

CONSUMOGUSTOS é o nome desta campaña, promovida polo Foro Enrique Peinador e pola Asociación Galega de Adegueiros, en colaboración coa Secretaría Xeral de Política Lingúística, que tamén conta co apoio de produtores, hostaleiros, adegas e sindicatos, e que pretente promover un consumo responsable cos produtos do país e a lingua galega.

Escoller productos e establecementos que recoñezan a nosa identidade na etiquetaxe é unha boa maneira de pedir que se respecte a nosa lingua nas relacións comerciais e na comunicación coa clientela.

Nós somos responsables desa demanda como persoas consumidoras e podemos ser comsumidoras activas reclamando que os produtos do país estean etiquetados na lingua do país.

 

EU FALAREI, dende Chapela para o mundo

O Equipo de Dinamización da Lingua Galega do IES Chapela acaba de divulgar na rede o seu lipdub para promover a nosa lingua.

O resultado non pode ser mellor, a xulgar pola calidade da edición e o guión. Pero o que máis importa neste caso é a participación de 400 persoas, entre as que están 120 actrices e actores e 29 cantantes. Son alumnado, profesorado, persoal non docente, pais e nais, veciñas e veciños de Chapela, que quixeron dar alento á lingua galega, necesitada de nós, hoxe máis ca nunca. Toda a comunidade chapelá tivo un lugar neste proxecto que pretende ser, segundo eles mesmos manifestan, “un canto de amor en defensa da Lingua Galega, mais tamén é unha denuncia da situación que vive un idioma que esmorece lentamente vendo recortada a súa presenza nos medios de comunicación ou na propia escola, e que día a día perde falantes entre a xente nova“.

O famoso tema de Gloria Gaynor, I will survive, serve de banda sonora para este vídeo con dobraxe ao galego, no que resoa un retrouso pegadizo e optimista: “Eu falarei, sempre en galego, que viva a nosa lingua outras mil primaveras máis“.

Parabéns por esta inxección de optimismo para a nosa lingua!

Avante coa lingua galega, dende Chapela para o mundo.

 

A revista EROSKI CONSUMER xa está en galego

A cadea de supermercados VEGALSA-EROSKI, acaba de editar a súa revista mensual en lingua galega.

A aposta pola nosa lingua, e polo resto das linguas oficiais do estado español vén xa de hai tempo, e na súa páxina web ofrécenos todos os seus contidos en lingua galega.

Unha boa forma de achegarnos á nosa lingua a través dos temas de saúde e alimentación que interesan ás persoas consumidoras, e un bo xeito de facer país.

Parabéns!