NOVA DIFUSIÓN DO APEGO, AGORA XA EN 23 CONCELLOS

Coa recente adhesión dos concellos da Coruña, Ames, Mazaricos, Moaña, Muros, Oleiros, Ponteceso, Rianxo, Ribadeo, Teo e Vimianzo, ao programa Apego, chega agora o momento de comezar a traballar coas familias interesadas en incorporar o galego á crianza das súas fillas e fillos.

Estes once concellos súmanse aos doce que puxeron en marcha a iniciativa en 2015 (A Baña, Carballo, Carnota, Ferrol, Narón, Negreira, Ourense, Pontevedra, Redondela, Rois, Santiago e Vigo) co impulso inicial da Coordinadora de Traballadores/as de Normalización da Lingua (CTNL). Grazas a esta colaboración intermunicipal, a poboación atinxida polo programa Apego supera xa o millón de habitantes.

Coas novas incorporacións, Apego está xa producindo novos recursos, nesta ocasión materiais audiovisuais para a súa difusión nas redes. O primeiro deles é un vídeo para transmitir os obxectivos do proxecto, explicar o funcionamento ás persoas que desexen sumarse e divulgar o programa de xeito atractivo.

O Apego mantense desde os servizos de normalización dos concellos participantes, a onde se poden dirixir as persoas que desexen máis información ou sumarse á comunidade de usuarias.

O programa procura aumentar a porcentaxe de nenos e nenas que reciben o galego desde o berce e arroupar o seu uso no seu proceso de socialización ata os 6 anos. Dentro das accións que se realizan, a máis coñecida xa é a entrega de cadansúa caixa con información e recursos en galego ás familias que acceden a formar parte da comunidade do programa. A partir desa adhesión, reciben periodicamente información e propostas para que os seus fillos e fillas se acheguen á lingua e á cultura galegas con naturalidade desde as primeiras idades. Para lograr isto, ademais dos espazos na rede onde se facilitan recursos (www.apego.gal e www.facebook.com/apego.gal), varios concellos publican materiais específicos para divulgar a oferta de actividade infantil e tamén reforzan a programación con convocatorias nas que as nenas e nenos podes gozar, aprender e relacionarse na nosa lingua.

O Servizo de Normalización Lingüística do Concello de Redondela está na planta baixa do multiúsos da Xunqueira. Tamén se pode contactar a través do correo electrónico normalizacion@redondela.es ou no teléfono 986400106.

“Entre arrolos e contiños” para a xente miúda da casa

O Servizo de Normalización Lingüística organiza unha nova actividade para público infantil e familias dentro do programa APEGO, de dinamización lingüística da primeira infancia.

Entre arrolos e contiños” é o nome desta actividade de música e narración oral que chega da man da compañía Migallas Teatro.

A actividade achéganos contos de risa, trasnos e carapuchiñas que conseguen estimular e animar á rapazada da casa e ás súas familias. A tradición oral preséntase da man da literatura infantil ao ritmo da música para facer unha actividade lúdica e festiva.

A primeira sesión desenvolveuse o domingo 11 de setembro, ás 12:00 h, na Sociedade Cultural do Viso, con gran éxito de público.

entre-arrolos-e-continos-o-viso

O domingo 25 de setembro, ás 18:00 h, chegará ao Centro Cultural Chan das Pipas de Saxamonde.

Está indicada para nenas e nenos de 0 a 6 anos e as súas familias, que poderán gozar das historias e coñecer instrumentos como o acordeón, o xilófono ou a melódica.

entre-arrolos-e-continos

A actividade é de balde pero ten limitado o aforamento, polo que cómpre anotarse a través do correo electrónico normalizacion@redondela.es, ou do teléfono do SNL (986 400 106).

Axenda escolar redondelá 2016-17

O Servizo de Normalización Lingüística e a Concellaría de Ensino veñen de editar, un ano máis, a Axenda escolar redondelá 2016-17, que recibirán 2025 alumnas e alumnos dos centros de ensino públicos do concello.

Axendas2016-17

As axendas estanse a distribuír de xeito gratuito entre o alumnado de ensino primario do CEP Santa Mariña, CEIP Alexandre Bóveda, CEIP de Cedeira, CEIP Igrexa–Chapela, CEIP Laredo, CEIP Outeiro das Penas, CEIP Porto-Cabeiro, CEIP Quintela e CEIP Santo Paio de Abaixo, e do 1º ciclo da ESO do IES Chapela, IES Illa San Simón, IES Mendiño e IES Pedro Floriani.

Este é o quinto ano consecutivo no que o Servizo de Normalización Lingüística se encarga da edición destas axendas escolares, co obxectivo de divulgar a cultura e o patrimonio locais entre a poboación máis nova, e promover a normalización da lingua galega entre o alumnado redondelán.

A edición para o curso 2016-2017 inclúe algunhas das actividades de dinamización e normalización lingüística desenvolvidas durante o curso pasado por este SNL para os centros de ensino: roteiros de toponimia, obradoiros de teatro radiofónico, actividades de narración oral, representacións teatrais e actividades das Letras Galegas 2016.

Ademais inclúe traballos escolares e as impresións do alumnado participante nas actividades desenvolvidas. Tamén se recolle parte do patrimonio inmaterial a través de ditos e coplas, a onomástica en lingua galega, as conmemoracións escolares e as celebracións propias de Redondela, e contidos relacionados especificamente coa toponimia local.

Con esta publicación o alumnado redondelán recibe unha ferramenta útil para a organización das tarefas escolares, pero ademais serve para incentivar o seu interese polo seu contorno, a cultura local, e para normalizar o uso da lingua galega na súa vida diaria.

//e.issuu.com/embed.html#4253376/38609718

I Concurso de teatro radiofónico escolar

O Servizo de Normalización Lingüística, en colaboración coa Radio Municipal de Redondela, organiza o I Concurso de teatro radiofónico destinado a alumnado de 3º ciclo de primaria e ESO.

Bánner_concurso_teatro radiofónico

Para a preparación das pezas teatrais organizáronse unhas xornadas formativas nos centros de ensino que así o solicitaron, a través da Coordinadora de Equipos de Dinamización Lingüística de Redondela, que se desenvolveron no curso 2014-15 e 2015-16, e nas que se deron pautas para a locución e dramatización dos textos teatrais escollidos. Estas sesións formativas foron impartidas por Marián Bañobre e Santiago Cortegoso, de Ibuprofeno Teatro, e nelas participaron grupos de 8 centros educativos.

Unha vez que a dramatización das pezas foi ensaiada, o alumnado participante desprazouse á Radio Municipal de Redondela para facer as gravacións, que se realizaron entre abril e maio.

No mes de xuño realizarase o concurso entre as pezas de teatro radiofónico gravadas este curso e mais o curso pasado, que serán emitidas en Radio Redondela entre o 2 e o 17 de xuño no programa “A Estación” (entre as 12.30 e as 13.00 h – ou na redifusión entre a 1.30 e as 2.00 h), e poderanse escoitar tamén a través da páxina do Facebook do Servizo de Normalización Lingüística https://www.facebook.com/servizo.redondela/, e do seu perfil na plataforma SoundCloud: https://soundcloud.com/servizo-normalizaci-n-ling-stica-redondela/sets/teatro-radiofonico.

As persoas interesadas poderán facer as súas votacións entre o 18 e o 27 de xuño a través do correo electrónico radioredondela@hotmail.com ou do teléfono do SNL, 986 400 106 (en horario de 8 a 15.00 h). Para iso cada persoa terá que identificarse e só se computará un voto por persoa para cada unha das modalidades, que son as seguintes:

  • PREMIO Á MELLOR DRAMATIZACIÓN RADIOFÓNICA
  • PREMIO Á CALIDADE LINGÜÍSTICA

O resultado do concurso darase a coñecer o 28 de xuño, e as pezas gañadoras destas dúas modalidades terán como premio unha visita guiada ao Museo Meirande e unha viaxe en barco á Illa de San Simón para os compoñentes e profesorado responsable das pezas gañadoras, que se celebrará na primeira quincena de setembro de 2016.

FÍOS DO QUERER, OBRADOIRO-CONCERTO DE MÚSICA INFANTIL

O Servizo de Normalización Lingüística organiza unha nova actividade dentro do programa APEGO, destinado á xente máis miúda da casa: FÍOS DO QUERER.

Trátase dun obradoiro-concerto que chega da man de César Freiría (Cé orquestra pantasma) con cancións para meniños e meniñas de 0 a 3 anos e para gozar en familia.

Haberá dúas sesións:

  • 24 de abril, ás 12:00 h, na Sociedade Labrego Cultural de Reboreda.

  • 15 de maio, ás 18:00 h, no Centro Cultural de Cesantes.

A actividade é de balde pero cómpre inscrición previa, que deberá formalizarse en normalizacion@redondela.es ou no teléfono 986 400 106.

Sin título-1

Continúe lendo FÍOS DO QUERER, OBRADOIRO-CONCERTO DE MÚSICA INFANTIL

A PRESENTACIÓN DE “PITO GALEGO, MÉTODO PRÁCTICO” INICIA AS ACTIVIDADES DA “VIII SEMANA DO LIBRO, A FESTA DAS PALABRAS”

O Servizo de Normalización Lingüística, dentro da programación da VIII Semana do libro, a festa das palabras, organizou a presentación do libro “PITO GALEGO, MÉTODO PRÁCTICO”, do músico, docente e investigador Moisés Quintas Suárez.

Pito galego_Moisés

A presentación-concerto celebrouse na Escola de Música de Chapela o 5 de abril, ás 18:30 h, con entrada libre. Asistiu numeroso público e alumnado da propia escola, que seguiu con atención as explicacións do autor deste manual, que foi facendo un achegamento teórico-práctico á historia do pito galego.

Pito galego2

Partindo do pito pastoril máis rudimentario, feito de cana, pasando polos diferentes pitos máis perfeccionados, que utilizaron maioritariamente madeira de buxo, ata chegar aos máis modernos e evolucionados, noutras tonalidades e con rexistros máis amplos, feitos en madeira de granadillo.

Na presentación, Moisés Quintas estivo compañado por Xosé Aldea, da editorial Ouvirmos, encargada da  edición, e por Viqui Pérez, que acompañou coas percusións as distintas interpretacións dos pitos. Presentou o acto a directora da Escola de Música de Chapela, Begoña Rial.

Pito galego

Este manual, redactado en lingua galega, está apoiado na páxina web http://pitogalego.gal/, onde se poden atopar os audios coa demostración práctica das pezas estudadas e toda a información técnica precisa. Supón o primeiro método de pito galego, que contribúe a mostrar as posibilidades musicais deste instrumento e facilita a súa aprendizaxe, empregando unha metodoloxía progresiva, baseada no noso repertorio tradicional.

Pito galego3

Nesta primeira actividade da VIII Semana do libro, a festa das palabras, o público asistente, ademais de aprender as distintas posibilidades, sonoridades e tipos de pitos, achegouse tamén ao léxico relacionado cos materiais construtivos como cana, madeira de buxo ou granadillo, e á nomenclatura musical en lingua galega, pero tamén coñeceou o traballo de  artesáns galegos de importancia coma Basilio Carril ou Antón Corral.

 

OBRADOIRO DE RECURSOS EN GALEGO PARA FAMILIAS

O Servizo de Normalización Lingüística organiza unha nova actividade dentro do programa APEGO, de dinamización lingüística para a primeira infancia.

Desta volta trátase de dous obradoiros de recursos en galego para familias, que se desenvolverán en Redondela e Chapela, os días 21 de febreiro e 20 de marzo, respectivamente.

AcasaEncantada_feb-marzo2016

A CASA ENCANTADA DE ALÍ é o título deste obradoiro de Luís Prego e Fabaloba, no que achegarán ás familias participantes recursos para cantar, contar e xogar con nenas e nenos de 0 a 6 anos.

Luís Prego (músico, mestre e estudoso do patrimonio musical) e Fabaloba (empresa creadora e mantedora do portal “Alí, recursos en galego para a educación infantil”) xúntanse neste obradoiro para contar, cantar e xogar coas familias participantes.

A actividade é de balde pero ten límite de participación ( 20 nenos e nenas por sesión, cun máximo de dous adultos acompañantes), e cómpre inscrición previa no correo normalizacion@redondela.es ata dous días antes do comezo de cada obradoiro.

  • O lugar e horarios de celebración son os seguintes:
    Domingo 21 de febreiro, 12:00 h. Casa da Cultura de Redondela.
    Domingo 20 de marzo, 12:00 h. Multiúsos do Piñeiral do Crego, Chapela.

Nestas actividades, e mais nas que se organicen no marco deste proxecto, terán prioridade as familias inscritas no programa APEGO, un proxecto colaborativo desenvolvido por doce concellos a través dos seus servizos de normalización lingüística, cuxo obxectivo principal é implicar ás familias na valoración positiva da lingua propia, incrementar a porcentaxe de nenos e nenas que adquiren o galego como lingua inicial e promover que o usen de maneira habitual.

Para inscribirse neste programa hai que dirixirse ao Servizo de Normalización Lingüística situado na planta baixa do multiúsos da Xunqueira, e cómpre estar agardando a chegada dun novo membro á familia ou que teña nacido no ano 2015. Coa inscrición, as familias participantes recibirán un agasallo con diverso material en galego para a crianza.

Funcións escolares da “Carapuchiña Vermella”

A primeira actividade do trimestre organizada dende o Servizo de Normalización Lingüística en colaboración cos centros de ensino redondeláns, desenvolveuse o 22 e o 25 de xaneiro en Chapela e Redondela, coa representación do teatro-musical “Carapuchiña Vermella”, de Educateatro Producións.
Esta é unha versión actualizada e particular do clásico dos Irmáns Grimm, modernizada e musical, que fai participar ao público da representación.
Participaron 748 escolares das escolas infantís: A Marisma, San Pedro e Ventosela; e dos centros de primaria: CEP Santa Mariña, CEIP Alexandre Bóveda, CEIP de Cedeira, CEIP Igrexa-Chapela, CEIP Laredo, CEIP Outeiro das Penas, CEIP Porto Cabeiro, CEIP Quintela e CEIP Santo Paio de Abaixo. As idades das escolares ían dos 4 aos 10 anos.
 A historia está narrada por Plácido, un escritor de contos que, axudado pola súa vella máquina de escribir, traballará arreo para mecanografar o conto máis bonito do mundo enteiro: Carapuchiña Vermella.
A proposta mestura teatro de actor con manipulación de corpóreos e voz en directo, para transmitir aos cativos e cativas valores como a ecoloxía, a igualdade, aspectos relacionados coa reciclaxe e o aproveitamento dos recursos,  ou as profesións, evitando a compoñente sexista.

(Fotos de Rafa Estévez)

ACTIVIDADES DO APEGO PARA OUTUBRO E NOVEMBRO

O programa APEGO continúa desenvolvendo actividades para promover o uso da lingua galega entre a poboación máis nova e nas súas familias.

Nos meses de outubro e novembro realizaranse tres novas actividades orientadas a bebés e á primeira infancia, en diferentes espazos do multiúsos da Xunqueira.

3 de outubro, 12.00 h.
Raquel Queizás: NANOCONTOS.

Contacontos para bebés de de 0 a 3 anos, acompañados dunha persoa adulta. Duración: 40 minutos. Nanocontos

Este é un espectáculo que estimula as habilidades de percepción espacial e a psicomotricidade dos bebés a través de pequenas historias adaptadas para captar o seu interese e cunha duración apropiada á súa capacidade de atención.

Para os nosos amigos os animais cada día é unha nova aventura chea de cousas que aprender mentres xogan coas cores, as formas e a música. Porque cando se é tan pequeno até as cousas máis sinxelas se converten en todo un reto. Reinventan o mundo cunha mirada que o ve todo por primeira vez, abraiándose a cada paso mentres aprenden novos nomes para os obxectos que acaban de descubrir.

De balde, con prazas limitadas. Inscrición previa no teléfono 986 402 865

25 de outubro, 12.00 h.
Elefante Elegante: OS AXÓUXERES.

Dan man da compañía de teatro Elefante Elegante, a xira dos Axóuxeres 2015 percorrerá 26 localidades da Rede de Dinamización Lingüística (RDL) da Xunta de Galicia, entre as que se atopa Redondela. AxóuxeresOs Axóuxeres son o encontro da xente miúda da casa coas artes escénicas, co teatro, coa música en directo… cos primeiros xogos e coas primeiras cancións en galego… coa lingua de noso. Cada Encontro dos Axóuxeres, de aproximadamente 40 minutos de duración, foi creado para ofrecerlles aos bebés e nenos/as de 0 a 6 anos un espazo onde gozar e abrirse ao descubrimento do mundo en galego.

O título desta proposta é O peixiño de María, unha aventura teatral, musical e lúdica na que a xente miúda se mergullará na profundidade do mar para achegarse a valores como a ecoloxía ou a amizade. Unha experiencia sensorial e lingüística coa que aprender e levar para a casa divertidas cancións, adiviñas e xogos.

A entrada é de balde con reserva previa ata completar a capacidade. As persoas interesadas en participar cos seus bebés ou nenos/as de 0 a 6 anos poderán inscribirse previamente, de luns a venres e en horario de 10:00 a 13:00 horas, no teléfono 697 363 089.

22 de novembro, 18.00 h.
Cinema infantil: O PEQUENO MAGO.

Incluída na programación de Cinemas de Galicia, chega ao auditorio da Xunqueira a proxección deste filme de animación e aventuras, para público familiar. o-pequeno-magoTrátase dunha produción galega dirixida por Roque Cameselle que conta as azarosas e intrépidas aventuras de Bieito Dubidoso, un neno de nove anos con dotes máxicas, que consegue que uns malvados guerreiros fuxan espavorecidos. A partir dese momento comeza a ser coñecido coma “o pequeno mago”, e a vivir unha morea de aventuras a carón da súa amiga Destreza, coa que loitará contra a superstición e o atraso.

As entradas pódense adquirir no multiúsos da Xunqueira ao prezo de 3 €.

Cartel_Apego_outubro-novembro2015