Axenda escolar redondelá 2015-2016

O Servizo de Normalización Lingüística e a Concellaría de Ensino do Concello de Redondela, en colaboración cos centros de ensino público redondeláns, editaron novamente a Axenda escolar redondelá, que recibirán 2025 alumnos e alumnas dos centros de ensino públicos do concello para o curso escolar 2015-2016.

As axendas estanse a distribuír de balde entre o alumnado de ensino primario do CEP Santa Mariña, CEIP Alexandre Bóveda, CEIP de Cedeira, CEIP Igrexa–Chapela, CEIP Laredo, CEIP Outeiro das Penas, CEIP Porto-Cabeiro, CEIP Quintela e CEIP Santo Paio de Abaixo, e do 1º ciclo da ESO do IES Chapela, IES Illa San Simón, IES Mendiño e IES Pedro Floriani.

Este é o cuarto ano consecutivo que se publican estas axendas co obxectivo de divulgar aspectos da cultura e do patrimonio locais entre a poboación máis nova, e contribuír a normalizar o uso da lingua galega entre o alumnado redondelán.

A edición para o curso 2015-2016 inclúe algúns dos traballos de dinamización cultural e lingüística desenvolvidos durante o curso pasado polo Servizo de Normalización Lingüística cos centros de ensino, recupérase parte do patrimonio inmaterial a través de ditos e coplas, a onomástica en lingua galega, inclúe as conmemoracións escolares e as celebracións propias de Redondela, e contén especificamente contidos relacionados coa toponimia local.

//e.issuu.com/embed.html#4253376/30049659

Con esta publicación achégase ao alumnado redondelán unha ferramenta útil para a organización das tarefas escolares, e preséntase coma un elemento necesario para a promoción da lingua galega e do patrimonio redondelán entre a poboación escolar.

Actividades para o APEGO en setembro

O Servizo de Normalización Lingüística organiza varias actividades, no mes de setembro, destinadas a bebés e á primeira infancia, co obxectivo de promover a dinamización lingüística nas idades máis temperás e como apoio ao desenvolvemento do programa APEGO.

Apego vai dirixido ás nais e pais para axudar á socialización en galego e crear vínculos coa familia, para asentar o arraigo á nosa terra e á lingua que falamos. Pois a lingua na que aprendemos a falar vai ser a base da identidade futura das nenas e nenos de hoxe, e a través das actividades que se organizan preténdese darlle soporte a esa necesidade.

Cartel_APEGO_setembro_final

As actividades programadas son as seguintes:

Continúe lendo Actividades para o APEGO en setembro

O APEGO CHEGA A REDONDELA

A pasada semana o SNL presentou o APEGO, un proxecto de dinamización lingüística na primeira infancia.

Apego2

Trátase dun proxecto colaborativo desenvolvido por doce concellos (A Baña, Carballo, Carnota, Ferrol, Narón, Negreira, Ourense, Pontevedra, Redondela, Rois, Santiago de Compostela e Vigo), a través dos seus servizos de normalización lingüística, cuxo obxectivo principal é implicar as familias na valoración positiva da lingua propia, incrementar a porcentaxe de nenos e nenas que adquiren o galego como lingua inicial e promover que o usen de maneira habitual.

Continúe lendo O APEGO CHEGA A REDONDELA

Axenda escolar redondelá 2014-2015

O Servizo de Normalización Lingüística e a Concellaría de Ensino do Concello de Redondela, en colaboración cos centros de ensino público redondeláns (a través da Coordinadora ENDL de Redondela), editaron de novo a Axenda escolar redondelá, que recibirán preto de 1900 alumnos e alumnas dos centros de ensino públicos redondeláns para o curso 2014-2015 . Axendas escolares1

As axendas estanse a distribuír de balde entre o alumnado de ensino primario do CEP Santa Mariña, CEIP Alexandre Bóveda, CEIP de Cedeira, CEIP Igrexa– Chapela, CEIP Laredo, CEIP Outeiro das Penas, CEIP Porto-Cabeiro, CEIP Quintela e CEIP Santo Paio de Abaixo, e de 1º ciclo da ESO do IES Chapela, IES Illa San Simón, IES Mendiño e IES Pedro Floriani.

Este é o terceiro ano consecutivo que se publican estas axendas co obxectivo de divulgar aspectos da cultura e do patrimonio locais entre a poboación máis nova, e contribuír a normalizar o uso da lingua galega entre o alumnado redondelán.

A edición para o curso 2014-2015 inclúe algúns traballos de dinamización cultural e normalización lingüística desenvolvidos durante o curso pasado (coma as funcións escolares de teatro ou monicreques); iniciativas a prol da lingua galega coma o videoclip “Terra”; información relativa a construcións populares e tradicións; historias relacionadas coa tradición redondelá; elementos do patrimonio arquitectónico; divúlgase a figura de Rita Otero, persoeiro redondelán homenaxeado en 2014; recupérase parte do patrimonio inmaterial a través de ditos e coplas; a onomástica en lingua galega; e inclúe as conmemoracións escolares e as celebracións de Redondela.

Poderase descargar en breve, en formato pdf, do blog do SNL http://servizonlredondela.blogaliza.org/, e mais no da Coordinadora ENDL  de Redondela http://coordinadoraendlredondela.blogspot.com.es/

Esta publicación foi posible grazas á participación dos centros de ensino público redondeláns, e ano a ano foise convertendo nunha ferramenta útil para a organización escolar do alumnado e nun elemento necesario para a promoción da lingua galega e do patrimonio redondelán entre a poboación escolar.

Pódese descargar na seguinte ligazón: http://issuu.com/servizonormalizacionlinguisticaredo/docs/axenda_esc._redondel___2014-2015/1

Mapas coa toponimia de Negros e Saxamonde

Comeza a exposición pública dos mapas coa toponimia recollida nas parroquias de Negros e Saxamonde.

O traballo de recollida da toponimia redondelá iniciouse en 2012, froito da celebración dun curso de toponimia organizado polo IEM (Instituto de Estudos Miñoranos), a Universidade de Vigo e os Concellos de Vigo e Pontevedra, no que participou o Servizo de Normalización Lingüística. Daquela comezouse cos traballos de campo en Saxamonde e Negros, e realizouse a recollida da microtoponimia e a súa xeorreferenciación. Con esa información traspasáronse agora os datos aos mapas que van ser expostos nos centros culturais de Chan das Pipas (en Saxamonde), e no Centro cultural e veciñal de Negros.

O obxectivo desta exposición pública é facilitar á veciñanza destas dúas parroquias que poida comprobar se os nomes recollidos son correctos e se están ben localizados nos mapas. Deste xeito a veciñanza poderá corrixir ou completar a información recollida, para o que se disporá tamén dun formulario onde rexistrar os comentarios e emendas.

O rexistro desta valiosa información é fundamental para evitar que se perda ese rico patrimonio, que nos transmite información da historia, dos usos e costumes, e dos lugares máis significativos de cada territorio, dende os nomes dos camiños e corredoiras, pasando polas terras de cultivo, o monte, os ríos e regatos, até construcións singulares e comunitarias como cruceiros, fontes ou lavadoiros.

Os mapas estarán a disposición da veciñanza dende o 18 de decembro até o 31 de xaneiro no horario habitual de apertura de cada centro cultural.

Axenda escolar redondelá 2013-2014

O Servizo de Normalización Lingüística e a Concellaría de Ensino editan, novamente, a Axenda escolar redondelá, desta volta para o curso 2013-2014, en colaboración cos centros de ensino redondeláns e a través da Coordinadora ENDL de Redondela.

Con esta publicación, que se distribuirá de balde a alumnado de 2º e 3º ciclo de primaria e de 1º e 2º da ESO, preténdese divulgar aspectos da cultura e o patrimonio locais, facendo fincapé en persoeiros redondeláns destacados, en elementos do patrimonio material e inmaterial e en traballos de dinamización cultural e lingüística desenvolvidos no curso pasado. Ademais inclúe coplas e refráns, onomástica en lingua galega e referencias ao patrimonio e ás celebracións  de Redondela.

O pano de fondo desta ferramenta é contribuír a normalizar o uso da lingua galega no día a día da actividade escolar, e ha servir para organizar as tarefas do alumnado e incluír aspectos culturais propios na actividade académica.

A tiraxe desta axenda foi de 1600 exemplares, que se distribuirán entre o alumnado dos centros que así o solicitaron (CEP Santa Mariña, CEIP Alexandre Bóveda, CEIP de Cedeira,CEIP Igrexa – Chapela,CEIP Laredo,CEIP Porto-Cabeiro, CEIP Quintela, CEIP Santo Paio de Abaixo, IES Chapela, IES Illa San Simón, IES Mendiño e IES Pedro Floriani).

//e.issuu.com/embed.html#2400817/4705359

Roberto Vidal Bolaño a través de Roberto Pascual

Para ilustrarnos acerca da figura homenaxeada nas Letras Galegas 2013, este luns, 20 de maio, ás 20.30 h, na Casa da Cultura de Redondela, o autor e crítico teatral, profesor e director da Mostra Internacional de Teatro de Ribadavia, Roberto Pascual,  achegaranos a Roberto Vidal Bolaño e ás diferentes profesións teatrais  que tanto contribuíu a dignificar e modernizar.

Para iso vai explicar e profundar sobre as cuestións desenvolvidas no seu libro “Roberto Vidal Bolaño e os oficios do teatro“, publicado por Edicións Xerais.

E saberemos que Roberto Vidal Bolaño utilizou todos os recursos posibles e inventou outros para facernos entender o teatro, para modernizalo e dignificalo, coa súa poderosa voz, “con máscaras, coa forza expresiva do corpo, dos ritmos populares, de técnicas audiovisuais…”.

“Esta obra amosa o que hai detrás dos fíos que crean a maxia inesgotable, eternamente transformadora, da arte do teatro”, e Roberto Pascual vainos axudar a descubrilo.

Taboleiro do libro galego

O profesor, escritor, tradutor e crítico literario Ramón Nicolás vén de inaugurar un novo apartado no seu  sitio web para divulgar o libro galego.

O TABOLEIRO DO LIBRO GALEGO é un proxecto de divulgación do libro galego en colaboración con 12 librarías de diferentes localidades do país (de Vigo, Pontevedra, Lugo, Ourense,  Allariz,  Arteixo e  Compostela), no que compón unha listaxe semanal das obras máis vendidas nas nosas letras, clasificadas por xéneros e en distintas categorías (narrativa, poesía, ensaio-teatro, literatura infantil e xuvenil, banda deseñada e mais álbum ilustrado).

As librarías achegan os datos para elaborar estas listaxes que servirán para manter informados os potenciais lectores e achegarlles información a través de ligazóns sobre cada libro ou edición.

Unha boa iniciativa coa que poderemos estar informados e aprenderemos o que se coce nas editoriais galegas.

Probas para a obtención dos Celga en 2013

A Secretaría Xeral de Política Lingüística publicou a convocatoria de probas para a obtención dos Certificados de lingua galega (Celga) en 2013. O prazo de matrícula está aberto até o 3 de abril.
Celga

PERSOAS DESTINATARIAS
Maiores de 16 anos

PRAZO DE INSCRICIÓN
Até o 3 de abril de 2013

DATAS DAS PROBAS
>Celga 1: 9 de xuño
>Celga 2: 2 de xuño
>Celga 3: 8 de xuño
>Celga 4: 1 de xuño

LUGARES DOS EXAMES
-Celga 1: Santiago de Compostela, Barcelona, Madrid e Ponferrada
-Celga 2, 3 e 4: Santiago de Compostela, A Coruña, Lugo, Ourense, Vigo, Barcelona, Madrid e Ponferrada

TAXA ÚNICA
15,61 €

Convocatoria completa (DOG do 16/1/13 .pdf) >

Impreso para o pagamento das taxas >

Códigos para cubrir a folla de taxas (.pdf)>

Modelo de solicitude>

Convocatoria de cursos preparatorios para as probas dos Celga

Glosario redondelán

O Servizo de Normalización Lingüística, en colaboración con Radio Redondela,  pretende facer un glosario de termos xenuinos de Redondela e a súa contorna. Con este obxectivo solicita a colaboración de toda a veciñanza redondelá para que fagan as súas achegas e contribúan a crear este glosario de termos e expresións redondelás en lingua galega.

GLOSARIO REDONDELÁN
Usas palabras galegas que non atopas nos dicionarios?
Os teus pais ou avós din palabras que só lles escoitas a eles?
Hai expresións ou palabras que usamos en Redondela e que non entenden fóra da nosa contorna?

Se fas as túas achegas poderemos crear o GLOSARIO REDONDELÁN, un inventario de termos e expresións que nos corresponden en exclusiva.

Podes participar a través de Radio Redondela ou do SNL, enviando as túas achegas a través do correo electrónico (radioredondela@hotmail.com ou normalizacion@redondela.info), vía Facebook (http://www.facebook.com/servizo.redondela) ou nos teléfonos 986408139 ou 986400300.