Campaña a prol do galego na hostelaría

A actividade foi impulsada en colaboración coa Asociación de Empresarios/as de Redondela no sector da hostelaría. Trátase da distribución de 50.000 manteis de papel dun só uso con dúas mensaxes lingüísticas. Unha máis dirixida aos turistas, para que coñezan os nomes dos utensilios de comer; e a outra dirixida ao público galego para que preserven a forma galega dos peixes, que é a de uso tradicional pero que se vai mudando polas formas castelás (dende cando o rapante se lle chama “gallo”?).


Por último, dende o SNL informan que se levarán máis accións nos sectores ligados ao comercio local así como actividades dirixidas ás crianzas.

A galeguización da lonxa de Cesantes

O Concello de Redondela e a Confraría de Pescadores de San Xoán de Redondela asinaron un convenio para impulsar un proceso de normalización lingüística na lonxa de Cesantes. Porque sendo como é o galego a lingua maioritaria da xente do mar dende a aparición mesma da nosa lingua, que sentido tiña que a vida administrativa e escrita fosen en castelán?

Debemos agradecer ao patrón maior, á directiva e en xeral á comunidade mariñeira a boa acollida da nosa iniciativa.

Filmoteca galega

Inaugurouse, por iniciativa do Servizo de Normalización Lingüística, a sección de Filmoteca Galega que se situará na biblioteca municipal de Redondela.

O propósito é constituír un fondo dos filmes galegos e en galego. Dentro desta onda crecente de interese polo Novo Cinema Galego, o noso concello quixo colaborar na súa difusión. Así, se o pasado ano celebramos un ciclo de cinema galego, agora queremos favorecer a súa divulgación a partir do préstamo.

Entre os filmes que poderedes atopar están “O que arde”, de Oliver Laxe; “Trinta lumes”, de Diana Toucedo; “A mariñeira”, de Antón Dobao; ou “A esmorga”, de Ignacio Vilar.

Está é a primeira sección que, como tal, se crea nun concello de toda Galicia. E estamos moi contentos e contentas por iso, que volve situar Redondela nunha referencia. Unha proposta que impulsa e divulga a creación audiovisual en galego

Parque Xohana Torres

O Servizo de Normalización Lingüística continúa promovendo e divulgando o compromiso coa lingua galega de homes e mulleres. Por iso propuxo dedicar cada parque infantil a unha persoa vencellada á cultura galega.

O primeiro deles foi Eduardo Blanco Amor pola relación que ten coa vila. Como é sabido, o actual Premio de Novela Longa Blanco Amor foi ideado e iniciado polo Concello de Redondela. Hoxe é unha feliz nova saber que se converteu nun dos premios de referencia do país.

O segundo parque tocoulle a unha muller de gran compromiso social, cultural e feminista: Xohana Torres. Por iso, ademais de instalar un panel informativo no parque da Alameda que, a partir de agora, levará o seu nome, tamén se fixo unha pequena homenaxe.

Neste acto participaron cinco mulleres, de distintas idades, que leron poemas de Xohana. Despois houbo un pequeno concerto a cargo de Antía Muíño.

Música, literatura, feminismo… en lingua galega!

Redondela celebra o Día Nacional de Galicia

O Concello de Redondela celebra, coma cada ano, o Día Nacional de Galicia.

As actividades repartiranse en douas grandes actos. O venres 24, no paseo náutico de Chapela, actuarán os grupos Pelepau e a Banda de Música de Chapela. O sábado 25 o acto central será no serán na Alameda de Castelao. Alí realizarase o acto institucional coa participación da corporación, coa lectura de textos por parte de crianzas que tratarán sobre a Xeración Nós (da cal se celebra neste 2020 o seu centenario) e o izado da bandeira galega. Despois haberá un concerto no Campo da Feira a cargo da cantante Guadi Galego.

Ademais, Guadi será recoñecida por parte do Concello de Redondela pola súa achega tanto no eido dos dereitos da muller coma polo seu compromiso coa cultura galega.

Maria Solinha: un filme en Redondela

O Concello de Redondela, por medio do seu Servizo de Normalización Lingüística, colaborou de maneira activa na preparación deste filme. Fíxoo poñendo a historia de Redondela, en particular da lenda da coca e a danza das espadas, nas mans do director Ignacio Vilar e do seu equipo.

Redondela ten un papel protagonista neste filme rodado integramente en galego. Son varios os veciños e veciñas que participan como figurantes. A escea da danza das espadas ten un lugar central na rodaxe.

Este filme será proxectado en moitos concellos galegos e tamén en festivais internacionais. É unha maneira de poñer en valor e divulgar os valores, costumes e tradicións da vila de Redondela.

Ciclo dedicado ao Novo Cinema Galego

Neste Nadal o Servizo de Normalización Lingüística organiza un ciclo dedicado ao Novo Cinema Galego. Terá a seguinte programación no Auditorio da Xunqueira:

Venres 29 de novembro, “O que arde”, de Óliver Laxe.
Xoves 5 de decembro, “Arraianos”, de Eloy Enciso.
Sábado 21 de decembro, “Mamasunción” de Chano Piñeiro (homenaxe).
Xoves 26 de decembro, “Trinta lumes” de Diana Toucedo.

O filme en galego máis visto na historia.

O primeiro filme en galego gañador en Cannes, Toronto e Mar da Prata.

O filme arredor dos incendios e da Galicia rural, co poderío da paisaxe e a reflexión con poucas palabras.

Chega a Redondela “O que arde”, de Óliver Laxe. Unha oportunidade para mirar cine na vila dos viadutos.

As entradas (2 ‎€) poderanse recoller no Multiúsos da Xunqueira no horario establecido (pola mañá e en findes; polas tardes pódese reservar) a partir deste sábado.

E ademais, agardamos ter unha visita especial para falarnos da película. Pro isto, aínda é un segredo.

 

MULTIÚSOS DA XUNQUEIRA VENRES 29 DE NOVEMBRO,ÁS 20_30H ENTRADAS_ 2

Venres Cativos: “Pitusa semifusa”

pitusa Redondela.jpg

 

O Servizo de Normalización Lingüística organiza un novo “Venres Cativos”, o último deste ano 2019. Pra pechar este ano de actividades de Apego teremos connosco a Pitusa Semifusa. Cantigas e bailes para coñecer diversos instrumentos musicais a través dunha nena protagonista, neta dun director de orquestra. Devagar a cativa irá aprendendo letras e músicas até completa un verdadeiro concerto musical.

O acto será no Multiúsos da Xunqueira o venres 29 de novembro ás 18:00h. A entrada é de balde até completa a capacidade.

Ciencia en galego

Redondela celebrou o Día da Ciencia en Galego cunhas actividades de “Matemaxia”, impartidas polo Mago Paco, que percorreu os centros escolares do municipio. Unha forma de achegar a lingua galega ao eido das ciencias e, en particular, ao das matemáticas. Unha forma, pois, de desterra prexuízos lingüísticos como aqueles que consideran a lingua galega incapaz de expresar linguaxe científica.

Non existen fronteiras para as linguas do mundo. Tampouco para o noso idioma galego.

IMG-20191108-WA0012