Axúdame a expresarme! Obradoiro sobre a pedagoxía Montessori

O martes 13 de xuño, ás 18:30 h, no Campo da Petanca, Sara Penas ofrecerá un obradoiro, incluído no proxecto Apego, sobre a pedagoxía Montessori. Esta consiste nun método educativo innovador que aposta pola autonomía da crianza, dende a comprensión e relación pai/nai-fillo/filla, para facilitar o desenvolvemento das capacidades intelectuais, sociais e físicas.

A actividade é de balde, aberta a todo o mundo e sen necesidade de inscrición previa.

Celebrámo-lo 17 de maio, Día das Letras Galegas

O pasado 17 de maio celebrámo-lo Día das Letras Galegas na Alameda, ante a estatua de Castelao.

O acto abriuno o responsable técnico do SNL reflexionando en voz alta sobre a situación da lingua galega e da literatura.

Deseguido contamos coa colaboración de varias persoas que leron textos de Casares (figura homenaxeada este ano), Eduardo Pondal (polo centenario da súa morte) e Ramón Cabanillas (quen traballou como secretario do Concello de Redondela). Cada persoa falou en representación de espazos sociais onde o galego está vivo. Grazas, pois, a Mercedes (ADC de Rande), Eva (inmigración), Alfonso (Dereito), Magdalena (mariscadora de a pé) e Carlos (Igrexa).

Pechou o acto a concelleira de Cultura, que se centrou na obra e biografía de Carlos Casares.

A continuación púxose a coroa de flores ós pes de Castelao e pechamos co canto do himno nacional galego.

Unha xornada acompañada dos grupos folclóricos das parroquias redondelás, que celebraron o Día da Muiñeira.

Que sirva o Día das Letras Galegas para divulga-la lectura do libro galego, o escritor homenaxeado e a toma de conciencia arredor da situación do idioma galego.

LIBROS QUE SE VEN E QUE SE LEN

O Servizo de Normalización Lingüística (SNL) do Concello de Redondela potencia unha campaña a prol da presenza do libro galego e en galego no cotián da veciñanza. Unha actividade que procura visualiza-la presenza da literatura (poesía, ensaio, teatro, prosa, infantil…) no día a día das persoas e animalas á lectura. Porque quen le, sabe máis.

Esta iniciativa, baixo o título “Libros que se ven, libros que se len” e se desenvolverá entre o 8 e o 28 de maio, sitúa os libros nos escaparates dos comercios de Redondela grazas á colaboración da Asociación de Empresarios de Redondela e dos propios comerciantes.

Por outra parte, o SNL de Redondela agradécelle á Editorial Galaxia e a Edicións Xerais de Galicia a súa xenerosa participación logo de emprestarnos de libros de todo tipo.

Por último, esta iniciativa encaixa detro do programa de actividades que tanto o SNL como a Concellería de Cultura organizan para o mes de maio co gallo da celebración das Letras Galegas.

Animamos a tódolos comerciantes a participar.

Exposición e conferencia sobre Carlos Casares

A Real Academia Galega decidiu que o Día das Letras Galegas 2017 fose para Carlos Casares, destacado escritor da nova narrativa galega.

O Concello de Redondela, dende os departamentos de cultura e normalización, súmase ás homenaxes e recoñecementos públicos. Por este motivo convoca á veciñanza de Redondela á inauguración dunha exposición sobre este autor, que se realizará o xoves 4 de maio ás 19:30h.

A continuación haberá unha mesa redonda con membros da Fundación Carlos Casares, co profesor Carlos López Bernárdez e presentado polo técnico do SNL de Redondela, Xurxo Martínez González.

A Orquestra de Saxos de Redondela pechará o acto.

Ó longo do mes haberá máis actividades coas que Redondela quere tributar memoria e recoñecemento ás letras galegas.

Axúdame a expresarme! Obradoiro sobre a pedagoxía Montessori

 

O xoves 27 de abril, ás 18h, no Multiúsos da Xunqueira, Sara Penas (Rachachán) ofrecerá un obradoiro, incluído no proxecto Apego, sobre a pedagoxía Montessori. Esta consiste nun método educativo innovador que aposta pola autonomía da crianza, dende a comprensión e relación pai/nai-fillo/filla, para facilitar o desenvolvemento das capacidades intelectuais, sociais e físicas.

O prazo de inscrición está aberto até o martes 25. Pódese realizar a reserva en normalizacion@redondela.es ou no teléfono 986 400 300, preguntando polo Servizo de Normalización Lingüística.

Acto central de homenaxe a Rosalía de Castro en Redondela

Hoxe, 2 de marzo, data que coincide coa celebración do Banquete de Conxo en 1856, Redondela celebrará o acto central de homenaxe e reivindicación de Rosalía de Castro.

O acto comezará ás 11:30 cunha recepción oficial, por parte de Alcaldía, do presidente da Fundación Rosalía de Castro, Anxo Angueira.

Ás 12:00, no Salón de Plenos do Concello de Redondela, participarán a Concelleira de Cultura, escolares do IES Illa de San Simón (que recitarán poemas rosalianos), o presidente da Fundación Rosalía de Castro e o Alcalde. Por último, o canto do himno galego pechará o acto.

Velaquí as ligazóns á rolda de prensa de onte:

http://redondela.tv/5395/redondela-homenaxea-a-rosalia/

http://www.radioredondela.com/articulo.php?id=7208