Axóuxeres en Redondela

A Secretaría Xeral de Política Lingüística programou para este ano AXÓUXERES en Redondela.

Trátase dun programa de dinamización lingüística dirixido a bebés de 0 a 3 anos que busca favorecer a incorporación do galego á comunicación entre as familias e os bebés, utilizando para iso o xogo, a música e a experiencia sensorial.

O obxectivo deste programa é axudar a que os pais e as nais contribúan á transmisión da lingua e, á vez, obteñan ideas para xogar na casa, prolongando no fogar as propias actividades.  Ademais a iniciativa homenaxeará aos avós, en recoñecemento polo seu labor de coidado, educación e transmisión da lingua aos máis pequenos.

A programación no noso concello inclúe:

ENCONTROS DOS AXÓUXERES

Domingo, 20 de febreiro de 2011, ás 12.00 h, na Casa da Cultura de Redondela.
Para asistir xa se pode  facer a inscrición no teléfono 686160879.

OBRADOIROS DOS AXÓUXERES

Venres, 25 de febreiro de 2011, ás 17.00 e 19.00 horas, na Casa da Cultura.
Sábado, 26 de febreiro de 2011, ás 12.00 horas, na Casa da Cultura.
A inscrición comezará uns días antes dos mesmos, no teléfono 630230338.

Cursos de lingua galega

A Secretaría Xeral de Política Lingüística vén de publicar a convocatoria de cursos de lingua galega preparatorios para as probas dos niveis CELGA 1, CELGA 2, CELGA 3 e CELGA 4, para particulares e colectivos de Galicia (DOG núm. 12, do 19 de xaneiro de 2011).

O Servizo de Normalización Lingüística vai solicitar que se imparta algún destes cursos no noso concello. Así pois, solicita a todas aquelas persoas interesadas que se dirixan ao SNL a través do enderezo electrónico normalizacion@redondela.info ou no teléfono 986 402842, para consultar cantas dúbidas teñan a este respecto e para realizar a inscrición nos mesmos.

O prazo para realizar a solicitude remata o vindeiro 22 de febreiro, e na petición deberán constar: nome completo, DNI, número de teléfono de contacto e nivel de coñecemento da lingua galega que posúen, ou o curso CELGA que desexan facer.

A organización de cursos no Concello de Redondela dependerá de que haxa un número suficiente de inscricións. Polo que dende o SNL anímase a toda a cidadanía, que queira mellorar a súa competencia en lingua galega, a que solicite esta formación.

Os cursos, que se desenvolverán entre finais de marzo e o 15 de xuño, son de acceso libre e de balde.

Aquelas persoas que prefiran asistir a algún dos cursos convocados noutras poboacións (as máis próximas son Vigo e Pontevedra), poderán facer unha solicitude individual (segundo o anexo I da convocatoria) para algún dos cursos xa programados. E se algún colectivo quere solicitar un curso para un grupo de persoas (entre 20 e 30) deberá cubrir a solicitude correspondente ao anexo II.

A nosa lingua no Senado

O Senado converteuse onte nunha ‘verdadeira cámara territorial’ ao permitir aos senadores expresárense, por primeira vez nunha sesión plenaria, na lingua propia da comunidade autónoma á que representan.

Até o de agora, as linguas cooficiais (galego, catalán, eúskaro e valenciano) podíanse   utilizar na Cámara Alta desde o ano 2005, pero só no debate da Comisión Xeral das Comunidades Autónomas, mentres que agora a súa  utilización amplíase a todos os plenos, aínda que con límites: o seu uso permitirase, inicialmente, só nas mocións.

Este foi, pois, un bo día para a nosa lingua, que adquire o status de oficialidade na cámara de representación territorial.

Agardamos que esta posibilidade sexa aproveitada, e que todos os senadores e senadoras  galegas sirvan de exemplo na utilización da nosa lingua como vehículo de comunicación e entendemento, e cumpran co seu deber de representar con dignidade ao territorio do que son representantes.

Cursos CELGA e linguaxe administrativa nas EOI

A Consellería de Educación vén de publicar no DOG de hoxe a convocatoria de cursos de lingua galega CELGA e de linguaxe administrativa galega, que se impartirán en 2011 nas EOI (Escolas Oficiais de Idiomas) de Galicia.

Os cursos son gratuitos e organízans en dúas quendas: a primeira en febreiro-marzo, e a segunda en outubro.

Para a primeira quenda o prazo é de 20 días naturais a partir de hoxe, e a inscrición haina que facer na secretaría da EOI onde se queira asistir ao curso, cubrindo o ANEXO I para os cursos de linguaxe administrativa, e o ANEXO III para os CELGA.

Nas EOI máis próximas ao noso concello, Vigo e Pontevedra, programáronse os seguintes cursos para a primeira quenda:

CELGA
Centro Nivel Data de inicio Data de fin Horario Días
EOI Vigo Celga 1 febreiro xuño 18.00 – 20.00 Mércores e venres
EOI Vigo Celga 4 febreiro xuño 10.30 – 12.30 Martes e xoves
EOI Vigo Celga 4 febreiro xuño 18.00 – 20.00 Mércores e venres
LINGUAXE ADMINISTRATIVA
Centro Nivel Data de inicio Data de fin Horario Días
EOI Pontevedra Medio febreiro maio 9.00 – 12.00 Martes e xoves
EOI Pontevedra Superior febreiro maio 9.00 – 11.00 Luns, mércores e venres
EOI Pontevedra Superior febreiro maio 12.00 – 15.00 Luns e mércores
EOI Pontevedra Superior marzo maio 16.30 – 19.30 Martes e xoves
EOI Vigo Medio febreiro xuño 9.00 – 11.00 Martes e xoves
EOI Vigo Superior febreiro xuño 9.00 – 11.00 Mércores e venres

Máis galego na rede

O mes de decembro trouxo á rede dúas novidades en lingua galega:
O manual en galego do sistema operativo UBUNTU 10.04, e o navegador Chromium e o sistema operativo ChromeOS.

«Comezar con Ubuntu» é a tradución ao galego, logo dunha revisión técnica e de redacción, realizada por membros da comunidade galega de software libre apoiada pola Oficina de Software Libre da USC e o Concello de Dodro.

Trátase do primeiro manual en galego para principiantes do sistema operativo Ubuntu. O manual está dispoñíbel para descargar de balde na rede no seguinte enderezo http://ubuntu.usc.es/manual/

Esta guía para principantes é de balde para descargar, ler, modificar e compartir. O manual axuda a familiarizarse con tarefas diarias como navegar pola Web, escoitar música ou escanear documentos.  As instrucións son sinxelas e é axeitado para todos os niveis de experiencia.

A guía editada polo Concello de Dodro e máis a Oficina de Software Libre da USC, conta co patrocinio da Deputación da Coruña e da Xunta de Galicia,  e a colaboración do Proxecto Trasno.

E tamén o navegador de código aberto Chromium (a partir do que se baseou o Chrome de Google),  e máis o sistema operativo ChromeOS,  xa están totalmente en galego grazas á tradución desenvolvida polo Proxecto Trasno.

Inaugúrase a Cidade da Cultura de Galicia

Hoxe inaugúrase en Santiago de Compostela, no monte Gaiás, a Cidade da Cultura de Galicia.

Nas súas instalacións, aínda inacabadas, pódense visitar xa o Arquivo, a Biblioteca e máis as instalacións en fase de construción. E agora mesmo hai unha exposición moi interesante para a cultura, a bibliografía e máis a literatura galegas.

Códice Calixtino

A exposición “Ex libris Gallaeciae. Dos libros de Galicia“, reúne 83 libros, códices ou   manuscritos considerados chave na construción da cultura galega. Trátase dunha escolma de   xoias bibliográficas que en conxunto debuxan a historia da construción da cultura galega, e   que inclúe desde os primeiros textos romanos que comezan a definir o territorio co nome de   Callaecia ata o primeiro libro electrónico en galego.
Estará aberta ata o 25 de febreiro no edificio do Arquivo.
VISITAS
Luns e Mércores ás 17.00 h.
Sábados e Domingos ás 12.00 e 17.00 h.
VISTAS DIDÁCTICAS PARA GRUPOS
Chamar ao 981 576 753 ou enviar mail a visitasdidacticas@cidadedacultura.org

Pero tamén, dende o 15 de xaneiro ata o 25 de xuño, hai unha programación titulada   Galicia, Ceo das Letras, na que se fará un percorrido pola vida e obra de nove autores galegos  e, ademais, de tres insignes veciños convidados a esta festa homenaxe (Pessoa, Borges, Espriu).

Cada sesión constará dun relatorio inicial impartido por un experto de referencia e dunha actuación artística (música, cine, teatro…) ligada ao espírito do autor ou autora homenaxeados.

III Xornadas de toponimia en Pontevedra

O Pazo da Cultura de Pontevedra acollerá, durante varias xornadas dos meses de xaneiro e febreiro, as III Xornadas de Toponimia. Estudo dos nomes de lugar e aplicacións didácticas.

Organizadas pola Concellaría de Normalización Lingüística e máis o Equipo de Normalización e Dinamización Lingüística do IES Luís Seoane, as xornadas están dirixidan a docentes de primaria e secundaria, entidades sociais e culturais (comunidades de montes, confrarías, asociacións veciñais, culturais…) e a outras persoas interesadas no tema.

O programa previsto é o seguinte:

  • Introdución, características da toponimia galega, estudo e clasificación da toponimia: orixe, significado. Gonzalo Navaza. 17, 19 e 24 de xaneiro

  • Talasonimia. Os nomes do mar. Xosé Lois Vilar. 25, 27 e 29 de xaneiro
  • Didáctica da toponimia. Xulia Marqués. 1 e 3 de febreiro

As xornadas desenvolveranse no salón de actos do Pazo da Cultura de Pontevedra os días 17, 19, 24, 25, 27 de xaneiro (de 17.30 a 20.30 horas), 1 e 3 de febreiro (de 17.30 a 19.30 horas). A saída de campo do sábado 29 de xaneiro será en Monteferro (Nigrán) e na Serra da Groba, para a que haberá que facer unha inscrición á parte.

As persoas interesadas deberán inscribirse no Servizo de Normalización Lingüística do Concello de Pontevedra. Rúa do Arcebispo Malvar, núm. 1. Fax: 986 851 800. normalizacionlinguistica@concellopontevedra.es

Tríptico en PDF

Detrás da canción en Redondela

A Secretaría Xeral de Política Lingüística achega a Redondela, hoxe 4 de xaneiro, o proxecto DETRÁS DA CANCIÓN, coa colaboración do SNL do Concello de Redondela, que se inclúe na programación do programa Bocaberta de dinamización lingüística. O proxecto inclúe a celebración de obradoiros de creación musical e un concerto final.

Como se compón unha canción de pop? Como se poden aproveitar as novas tecnoloxías para gravala e compartila co resto do mundo? A estas cuestións tenta responder esta actividade, na que integrantes dos grupos de pop galego Projecto Mourente e The Homens dan a coñecer a trastenda do proceso creativo.

Detrás da canción é unha actividade destinada a mozos e mozas a partir dos 12 anos, que pretende demostrar que compoñer cancións e gravalas é algo doado e que calquera o pode facer cunha mínima calidade. Pero alén de todo iso, quere mostrar que a lingua galega é un idioma tan válido coma calquera outro para a expresión musical de masas.

Os obradoiros desenvolveranse na sala da Rede de Telecentros de Redondela, no Multiusos da Xunqueira, dende as 18.00 ás 19.50 horas. Para participar nos mesmos é imprescindible formalizar a inscrición na web www.detrasdacancion.info ou presentarse no lugar e hora sinalados na convocatoria.